कैलारी गाउँपालिका स्तरीय अध्यक्ष कप पुस १५ गतेसे

पहुरा समाचारदाता
हसुलिया, ६ पुस । कैलाली जिल्लाके कैलारी गाउँपालिका स्तरीय अध्यक्ष रनिङ कप यिहे पुस १५ गतेसे हुइना बा ।

कैलारी गाउँपालिकाके आर्थिक सहयोग तथा कैलारी युथस युनाईटेड क्लवके आयोजनामे गाउँपालिका स्तरीय अध्यक्ष कप हुई जैटी रहल हो । प्रतियोगिता भव्यता साथ सम्पन्न करेक लाग टमान समिति गठन करके तयारी सुरु कैगिल कैलारी युथस युनाईटेड क्लवके वरिष्ठ सल्लाहकार श्रीराम चौधरी बटैलै । प्रतियोगितामे पुरुष फुटवल, महिला फुटवल, पुरुष भलिवल, पुरुष व्याडमिन्टन ओ पुरुष क्रिकेट रहना उहाँ जनैलै ।

प्रतियोगिताके लाग टमान समिति गठन कैगिल बा । जेम्ने फुटवल समितिके संयोजकमे प्रशुराम चौधरी, भलिवल संयोजक मोहन चौधरी, व्याडमिटन संयोजक सुनिल चौधरी, क्रिकेट संयोजक महेश चौधरी, स्वम सेवक संयोजक रामस्वरुप चौधरी, मञ्च व्यवस्थापक संयोजक सविता चौधरी ओ खेल मैदान मर्मत संयोजकमे भीखराम चौधरी रहल बटै ।

गाउँपालिका स्तरीय अध्यक्ष रनिङ कपमे पुरुष ओ महिला फुटवलके पहिल हुइना टिमहे एक लाख नगद प्रमाणपत्र, मेडल ओ ट्रफी पैही । दुसर टिम ५० हजार नगद प्रमाणपत्र, मेडल ओ ट्रफी पैही ।

ओस्टेक करके उत्कृष्ट खेलाडी, सर्वाधिक गोलकर्ता, उत्कृष्ट गोल रक्षक ओ उदयमान खेलाडी ३/३ हजार नगद रुप्या प्रमाणपत्र, मेडल ओ ट्रफी पैही ।

प्रतियोगिताके पुरुष भलिवलके पहिल विजेता ५० हजार नगद रुप्या, प्रमाणपत्र, मेडल ओ ट्रफी दुसरा टिमहे २५ हजार, उत्कृष्ट खेलाडी ३ हजार नगद रुप्या प्रमाणपत्र, मेडल ओ ट्रफी पैना आयोजक जनैले बा ।

पुरुष व्याडमिन्टनहे पहिल राशी २० हजार, दुसराहे १० हजार नगद रुप्या ओ प्रमाणपत्र, मेडल ओ ट्रफी पैही । ओस्टेक करके पुरुष क्रिकेटमे पहिल राशी २० हजार, दुसराहे १० हजार प्रमाणपत्र, मेडल ओ ट्रफीके व्यवस्था रहल आयोजक जनैले बा ।

प्रतियोगितामे वितरण कैना नगद पुरस्कार राशीमे नेपाल सरकारके ऐन नियम बमोजिम आकस्मिक लाभ कर कट्टी करके प्रदान कैना आयोजक जनैले बा । गाउँपालिका स्तरीय अध्यक्ष रनिङ कपमे गाउँपालिकाके प्रत्येक वडासे एक÷एक ठो पुरुष फुटवल टिम, महिला फुटवल टिम, पुरुष भलिवल टिम, पुरुष किकेट टिम ओ २÷२ ठो पुरुष व्याडमिन्टन टिम सहभागी कराई पर्ना आयोजक टिमके अध्यक्ष बनसरामम चौधरी बटैलै । प्रतियोगिता फिफा निमाअनुसार ओ नकआवट आधारके खेलजैना बा ।

कैलारी गाउँपालिका–३ स्थित यौङ व्वाइज क्लवके खेल मैदानमे हुइना प्रतियोगिताके लाग यिहे पुस १३ गते साँझ साढे ४ बजेसम टिम दर्ताके लाग समय डेहल बा । खेलकुदके टाइसिट पुस १४ गते दुपहरके १२ बजे निकर्ना आयोजक जनैले बा । प्रतियोगिताके उदघाटन १५ गते ११ बजे हुइना आयोजक कैलारी युथस युनाईटेड क्लवके सचिव आशिक चौधरी बटैलै ।