कैलारीमे अध्यक्ष रनिङ कप सुरु

पहुरा समाचारदाता
हसुलिया,१५ पुस । कैलालीके कैलारी गाउँपालिकामे पालिका स्तरीय अध्यक्ष रनिङ प्रतियोगिता सुरु हुइल बा ।

कैलारी गाउँपालिकाके आर्थिक सहयोग तथा कैलारी युथस युनाईटेड क्लवके आयोजनामे सुुरु हुइल गाउँपालिका स्तरीय अध्यक्ष कप उदघाटन कार्यक्रममे गाउँपालिकाके अध्यक्ष राजसमझ चौधरीके वडका पहुना गाउँपालिका उपाध्यक्ष भगवतीकुमारी चौधरी विशिष्ट पहुना पानसमे डिया बारके करल रहिट ।

ओस्टेक करके विशिष्ट पहुनामे प्रतियोगिताके मुख्य प्रयोजक गौरीशंकर डेन्टलके संचालक रतना एसके, कैलाली जिल्ला फुटवल संघके जिल्ला सदस्य मनिराम चौधरी, थारु कल्याण कारिणीसभाके केन्द्रीय सदस्य रामचरण चौधरी, प्रतियोगिताके सहप्रयोजक पुष्प कन्स्ट्रक्सन एण्ड सप्लायर्सके पुष्पराज भुषाल रहिट ।

उदघाटन कार्यक्रममे बोल्टी कार्यक्रमके वडका पहुना राजसमझ चौधरी कैलारी गाउँपालिका खेलकुदमे अब्बल हुइटी गैल बटैलै । उहाँ कहलै, यूवा परिवर्तनके बाहक हुइट । खेलकुदसंगे शिक्षा, कृषि, स्वास्थ्य क्षेत्रमे यूवाहुकनहे ध्यान डेहे परल ।’ कैलारी गाउँपालिकासे और क्षेत्रमे खेलकुल प्रतियोगिताके लाग जैना क्लवहे सहयोगमे कौनो कमी नइरख्नाफे उहाँ बटैलै ।

कार्यक्रममे विशिष्ट पहुना कैलारी गाउँपालिकाके उपाध्यक्ष भगवतीकुमारी चौधरी स्थानीय खेलाडी जिल्ला, प्रदेश, राष्ट्रिय, अन्र्तराष्ट्रिय खेलकुदसे बन्चित हुइटी रहल बटैली । उहाँ कहली, गाउँघरमेफे उत्कुष्ट खेलाडी बटै । अवसरके बन्चित हुके ओइने बाहेर आई नइसेकल हुइट । खेलकुदके माध्यमसे स्वास्थ्यके समेट विकास हुइल उहाँ बटैलै । खेलाडीहुकनके सम्मानके लाग अगामी दिनमे उपाध्यक्ष कपके लाग पहल कैना उहाँ बटैली ।

जिल्ला फुटबल संघके जिल्ला सदस्य मनिराम चौधरी स्थानीय स्तरमे ढेर खेलाडी उत्पादन हुइल मने अवसरसे बन्चित हुइल बटैलै । खेलकुदके माध्यमसे ढेर खेलाडी रोजगारीफे पाइल ओरसे खेलकुदमे ध्यान डेना खेलाडीहुकनहे आग्रह करलै ।
कैलारी युथस युनाईटेड क्लवके अध्यक्ष बनसराम चौधरीके अध्यक्षतामे हुइल उदघाटन कार्यक्रममे स्वागत मन्तव्य क्लवके सचिव आशिक चौधरी ओ संचालन रामबहादुर विक करले रहिट ।

प्रतियोगिताके उदघाटन कार्यक्रममे गाउँपालिकाके सक्कु वडाके अध्यक्ष, कार्यपालिका सदस्य, वडा सदस्य, टमान राजनितिक दलके प्रतिनिधि, स्थानीय भल्मन्सा, बुद्धिजिवीहुकनके सहभागिता रहे । प्रतियोगितामे पुरुष फुटवल, महिला फुटवल, पुरुष भलिवल, पुरुष व्याडमिन्टन ओ पुरुष क्रिकेट करके करिव ५५ ठो टिम सहभागि रहल कैलारी युथस युनाईटेड क्लवके वरिष्ठ सल्लाहकार श्रीराम चौधरी जनैलै ।

गाउँपालिका स्तरीय अध्यक्ष रनिङ कपमे पुरुष ओ महिला फुटवलके पहिल हुइना टिमहे एक लाख नगद प्रमाणपत्र, मेडल ओ ट्रफी पैही । दुसर टिम ५० हजार नगद प्रमाणपत्र, मेडल ओ ट्रफी पैही । ओस्टेक करके उत्कृष्ट खेलाडी, सर्वाधिक गोलकर्ता, उत्कृष्ट गोल रक्षक ओ उदयमान खेलाडी ३÷३ हजार नगद रुप्या प्रमाणपत्र, मेडल ओ ट्रफी पैही । प्रतियोगिताके पुरुष भलिवलके पहिल विजेता ५० हजार नगद रुप्या, प्रमाणपत्र, मेडल ओ ट्रफी दुसरा टिमहे २५ हजार, उत्कृष्ट खेलाडी ३ हजार नगद रुप्या प्रमाणपत्र, मेडल ओ ट्रफी पैना आयोजक जनैले बा ।

पुरुष व्याडमिन्टनहे पहिल राशी २० हजार, दुसराहे १० हजार नगद रुप्या ओ प्रमाणपत्र, मेडल ओ ट्रफी पैही । ओस्टेक करके पुरुष क्रिकेटमे पहिल राशी २० हजार, दुसराहे १० हजार प्रमाणपत्र, मेडल ओ ट्रफीके व्यवस्था रहल आयोजक जनैले बा । प्रतियोगितामे वितरण कैना नगद पुरस्कार राशीमे नेपाल सरकारके ऐन नियम बमोजिम आकस्मिक लाभ कर कट्टी करके प्रदान कैना आयोजक जनैले बा ।

गाउँपालिका स्तरीय अध्यक्ष रनिङ कपमे गाउँपालिकाके प्रत्येक वडासे एक÷एक ठो पुरुष फुटवल टिम, महिला फुटवल टिम, पुरुष भलिवल टिम, पुरुष किकेट टिम ओ २÷२ ठो पुरुष व्याडमिन्टन टिम सहभागी कराई पर्ना आयोजक टिमके अध्यक्ष बनसरामम चौधरी बटैलै ।

प्रतियोगिता फिफा निमाअनुसार ओ नकआवट आधारके खेलजैना बा । कैलारी गाउँपालिका–३ स्थित यौङ व्वाइज क्लवके खेल मैदानमे हुइटी रहल प्रतियोगिताके पहिल रोज वडा–७ ओ वडा–२ के टिम प्रतिस्पर्धा हुइल रहे । वडा नम्बर ७ शुन्यके विरुद्ध दुई गोल मारके विजयी हुइल रहे ।