नगरप्रमुख हमालके सह्रनिय कदम

धनगढी उपमहानगरपालिकाके नगरप्रमुख गोपाल हमालसे अपने प्राप्त कैना सेवा सुविधाके रकमसे विद्यालयहुकनके लाग शैक्षिक सामग्री खरिद करके उपलब्ध करैना घोेषणा करले बटै । आधारभूत तह कक्षा ८ के परीक्षामे शून्य नतिजा ननुइया धनगढीके १७ ठो सामुदायिक विद्यालयहे चालु शैक्षिक सत्रमे १० लाख बराबरके शैक्षिक सामग्री डेना कहले बटै । ओटरा केल नाही नगरप्रमुख हमालसे एक वर्षमे पैना सेवा सुविधाके रकम अपुग हुइलेसे अपने व्यक्तिगतओरसेफे रकम थप कैके शैक्षिक सामाग्री डेना घोषणा करले बटै । यिही आघेफे नगरप्रमुख हमालसे अपने पाइल सेवा सुविधाके रकम सामाजिक क्षेत्रमे लगानी करले बटै ।

विद्यालयके प्रधानाध्यापकहुकनहे शैक्षिक सामग्रीके अभावसे पठनपाठनमे समस्या हुइल बताइलपाछे नगरप्रमुख हमालसे कापी किताब, कलम, मसी लगायत विद्यालयसे पठनपाठनमे प्रयोग कैना शैक्षिक सामग्री खरिद करके प्रदान कैना कहले बटै । उहाँ विद्यार्थीहुकनहे विद्यालयमे टिकैना ओ मजा नतिजा नन्ना सक्कु पक्षसे लैजाई पर्ना बटैटी शैक्षिक सामग्रीके अभावमे पठनपाठन कमजोर हुई नइडेना उपमहानगरसे सक्कु मेरिक सहयोग कैना प्रतिबद्धताफे जनैले बटै ।

धनगढीमे आयोजित १७ विद्यालयसंग करल अन्तरक्रिया कार्यक्रममे अइना शैक्षिक सत्रमे मजा नतिजा नन्ना ओ सामुदायिक विद्यालयके सिकाइ उपलब्धी मजा बनैना उपमहानगरसे अइना आर्थिक वर्षमे ठोस योजना ओ कार्यक्रम नन्ना कहल बा । नगरप्रमुख हमाल शिक्षा क्षेत्रमे मजा नतिजा हासिल कैना परामर्शदाताके सहयोग लेना ओ शिक्षाके लाग बहुपक्षीय साझेदारी कैना योजना रहल कहले बटै ।

सामुदायिक विद्यालयके नतिजा मजा बनैना उपमहानगरसे काम करटी यी वर्षसे विद्यालयके अवस्था सुधार कैना सक्कु जाने लागे पर्ना जरुरी बा । समग्र शैक्षिक अवस्था सुधारके लाग उपमहानगरसे विज्ञके सहयोग लेके काम कैना योजना बनैले बा । कक्षा ८ के परिक्षमे शुन्य नतिजा आइल विद्यालयमे प्रअ, विद्यालय व्यवस्थापन समितिके अध्यक्ष तथा शिक्षक विच समन्वयके अभाव डेखल बा । टबमाररे एक जाने केल सहयोग करके नइहुुई अइना दिनमे विद्यालय तथा शैक्षिक गुणस्तर सुधारके लाग सक्कु जानेक प्रतिबद्धता ओ सहयोग आवश्यक बा ।