सुदूरपश्चिममे कुलगार्हस्थ उत्पादन ३ खर्ब ७६ अर्ब हुइना अनुमान
पहुरा समाचारदाता
धनगढी, २४ जेठ । सुदूरपश्चिम प्रदेशमे यी आर्थिक वर्षमे कुलगार्हस्थ उत्पादन उपभोक्ताके मूल्यमे करिव रु. ३ खर्व ७६ अर्व हुइना अनुमान कैगिल बा ।
मंगरके रोज धनगढीम हुइल आर्थिक वर्ष २०७९ ०८० के प्रादेशिक राष्टिय अनुमान सार्वजनिक कार्यक्रम राष्टिय तथ्यांक कार्यालय थापाथली काठमाडौंके तथ्यांक अधिकृत अवेधशकुमार शुल्क उ जानकारी डेहल हुइट । उहाँ कहलै गैल आर्थिक बर्षके संशोधित अनुमान करिव रु.३ खर्व ४५ अर्व रहल बा ।
गैल आर्थिक वर्षमे राष्ट्रिय तहमे कुल गार्हस्थ उत्पादनके ७.० प्रतिशत हिस्सा ओगटल यी प्रदेशसे यी आर्थिक वर्षमे समेत ७.० प्रतिशत योगदान पुगैना अनुमान रहल उहाँ जनैलै । ओस्टेक करके गैल आर्थिक बर्षमे कुल गार्हस्थ उत्पादनके बृद्धि दर ४.७८ प्रतिशत रहे कलेसे यी आर्थिक बर्षमे संकुचन आके १.७८ प्रतिशत कायम रहन अनुमान बा । कुल गार्हस्थ उत्पादनमे सबसे ढेर योगदान ३३.४ प्रतिशत कृषि क्षेत्रके बा कलेसे सबसे कम योगदान ०.१ प्रतिशत प्रशासनिक सहयोगी सेवा क्षेत्रके रहल बा ।
यी आर्थिक बर्षमे राष्ट्रिय वार्षिक कुल गार्हस्थ उत्पादन उपभोक्ताके मूल्यमे करिव रु.५३ खर्व ८१ अर्व हुइना अनुमान करलमे सबसे ढेर ३६.८ प्रतिशत योगदान सहित बागमती प्रदेशके कुलगार्हस्थ उत्पादन उपभोक्ताके मूल्यमे करिव रु.१९ खर्व ८१ अर्व हुइना अनुमान बा कलेसे सबसे कम कम ४.१ प्रतिशतके योगदान कर्णाली प्रदेशके उपभोक्ताके मूल्यमे करिव रु.२ खर्व २१ अर्वके हाराहारी हुइना अनुमान बा । बागमती प्रदेशपाछे कुल गार्हस्थ्य उत्पादनमे ढेर योगदान पुगैना प्रदेशमे क्रमशः कोशी, लुम्बिनी, मधेस, गण्डकी ओ सुदुरपश्चिम परठै ।
कुल गार्हस्थ्य उत्पादनके वृद्धि दर चालु आ.व. मे राष्ट्रियतहके उपभोक्ता मूल्यमे १.८६प्रतिशत अनुमान करलमे गण्डकी प्रदेशके आर्थिक बृद्धिदर सबसे ढेर ३.३प्रतिशत ओ बागमती प्रदेशके बृद्धिदर सबसे कम १.४प्रतिशत रहना अनुमान करल बा । संशोधित अनुमान अनुसारगत आर्थिक वर्षमे गण्डकी प्रदेशके बृद्धिदर सबसे ढेर ६.३५प्रतिश विल्गाइल बन कलेसे मधेश प्रदेशमे सबसे कम दर ४.६ प्रतिशत रहन विल्गाइल बा ।
औद्योगिक वर्गीकरण अनुसारके आर्थिक क्रियाकलापहे हेरेबेर गैल आर्थिक बर्ष ओ यी आर्थिक वर्षमे बागमती प्रदेश बाहेक सक्कु प्रदेशमे कृषि क्षेत्रके योगदान सबसे ढेर बा कलेसे बागमती प्रदेशमे थोक तथा खुद्रा व्यापार क्षेत्रके योगदान सबसे ढेर विल्गाइठ । यसिन हुइनामे यी प्रदेशमे बढटी शहरीकरण, ढेर जनसंख्या, राष्ट्रिय तहके भारी व्यापारिक कारोवार हुइट ।
ओस्टेक करके राष्ट्रिय तहमे दुसरा हिस्सा ओगटल व्यापार क्षेत्र कोशी, मधेश ओ लुम्बिनी प्रदेशमे दुसर हिस्सा कायम रहल बा कलेसे बागमती प्रदेशमे घरजग्गा सम्बन्धी कारोवार तथा अपने आवास सेवाके हिस्सा दुसरा बा ।
ओस्टे गण्डकी, कर्णाली ओ सुदुरपश्चिम प्रदेशमे सार्वजनिक प्रशासन ओ रक्षा क्षेत्रके योगदान दुसरा रहल विल्गाइठ । वाग्मती ओ मधेश प्रदेश बाहेक सक्कु प्रदेशके कुल गार्हस्थ्य उत्पादनमे प्रशासनिक सहयोगी सेवा क्रियाकलापके योगदान सबसे न्यून विल्गाइल तथ्यांक कार्यालय जनैले बा ।
कर्णाली प्रदेशमे यी आर्थिक वर्षमे कुलगार्हस्थ उत्पादन उपभोक्ताके मूल्यमे करिव रु. २ खर्व २१ अर्व हुइना अनुमान बा कलेसे गैल आर्थिक वर्षके संशोधित अनुमान करिव रु.२ खर्व १ अर्व रहल बा ।
लुम्बिनी प्रदेशमे यी आर्थिक बर्षममे कुलगार्हस्थ उत्पादन उपभोक्ताके मूल्यमे करिव रु. ७ खर्व ६२ अर्व हुइना अनुमान बा कलेसे गैल आर्थिक बर्षके संशोधित अनुमान करिव रु.६ खर्व ९७ अर्व रहल बा । गैल आर्थिक वर्षमे राष्ट्रिय तहमे कुल गार्हस्थ उत्पादनके १४.१ प्रतिशत हिस्सा ओगटल यी प्रदेशसे यी आर्थिक वर्षमे १४.२प्रतिशत योगदान पुगैना अनुमान बा । ओस्टेक करके गैल आ.व. मे कुल गार्हस्थ उत्पादनके बृद्धि दर ५.०३ प्रतिशत रहे कलेसे यी आर्थिक बर्षमे संकुचन आके २.०६ प्रतिशत केल कायम रहन अनुमान बा । कुल गार्हस्थ उत्पादनमे सबसे ढेर योगदान २९.८ प्रतिशत कृषि क्षेत्रके बा कलेसे सबसे ढेर कम योगदान ०.३ प्रतिशत प्रशासनिक सहयोगी सेवा क्षेत्रके रहल बा ।
गण्डकी प्रदेशमे यी आर्थिक बर्षमे कुलगार्हस्थ उत्पादन उपभोक्ताके मूल्यमे करिव रु. ४ खर्व ८२ अर्व हुइना अनुमान बा कलेसे गैल आर्थिक बर्षके संशोधित अनुमान करिव रु.४ खर्व ३७ अर्व रहल बा । गैल आर्थिक वर्षमे राष्ट्रिय तहमे कुल गार्हस्थ उत्पादनके ८.९प्रतिशत हिस्सा ओगटल यी प्रदेशसे यी आर्थिक वर्षमे ९.० प्रतिशत योगदान पुगैना अनुमान बा ।
बागमती प्रदेशमे कुलगार्हस्थ उत्पादन उपभोक्ताके मूल्यमे करिवरु. १९ खर्व ८१ अर्व हुइना अनुमान बा कलेसे गैल आर्थिक बर्षके संशोधित अनुमान करिव रु.१८ खर्व १९ अर्व रहल बा । मधेश प्रदेशमे रु.७ खर्व ७ अर्व हुइना अनुमान बा कलेसे गैल आर्थिक बर्षके संशोधित अनुमान करिव रु.६ खर्व ५० अर्व रहे । ओस्टेक कोशी प्रदेशमे यी आर्थिक बर्षमे कुल गार्हस्थ्य उत्पादन उपभोक्ताके मूल्यमे करिव रु. ८ खर्व ४९ अर्व हुइना अनुमान बा कलेसे गैल आ.व.के संशोधित अनुमान करिव रु. ७ खर्व ८० अर्व रहल बा । यी प्रदेशसे राष्ट्रिय तहके कुल गार्हस्थ्य उत्पादनमे १५.८ प्रतिशत योगदान पुगैना अनुमान बा ।
सुदूरपश्चिम प्रदेश नीति तथा योजना आयोगके सदस्य जगत बहादुरसिंह रावल सही तथ्यांकसे विकासमे महत्व पूर्ण योगदान पुगैना बटैलै । मुलुकमे संचालन हुइल उद्योग नीजि उद्योग सफल हुइल मने सरकारी लगानीमे संचालन हुइल उद्योग धरासायी हुइटी गैल बटैलै । यहाँ ८० प्रतिशत नागरिक कृषि पेशामे आधारित रहल मने १२ बर्ष खाद्यन्न नइपुगेबेर बाहेरसे नाने पर्ना अवस्था आइल बटैलै ।
सुदूरपश्चिम प्रदेश २०४६ सालपाछे केल राज्यके मुलधारमे आइल उहाँ कहलै । कर्णालीमे पुल नइरहटसम केन्द्रसम जोरल नइरहे । राजधानी जाईबेरफे भारतिय डगर प्रयोग करे परलफे उहाँ बटैलै ।
राष्टिय तथ्यांक कार्यालयके पूर्णबहादुर घर्तीमगरके अध्यक्षतामे हुइल कार्यक्रमके स्वागत मन्तव्य राष्टिय तथ्यांक कार्यालय कञ्चनपुरके निमित निर्देशक गौरी जोशी करल रहिट ।
