बलियामे यातायात व्यवस्था सेवा कार्यालयके उदघाटन
लम्कीचुहा नगरपालिका, मोहन्याल गाउँपालिका, जानकी गाउँपालिका, टिकापुर नगरपालिका, जोशीपुर गाउँपालिका ओस्टेक करके बर्दगोरिया गाउँपालिका लगायत क्षेत्रके जनताहे सहजता हुईना
पहुरा समाचारदाता
धनगढी, ११ बैशाख । सुदूरपश्चिम प्रदेशके मुख्यमन्त्री कमलबहादुर शाह कैलालीके लम्कीचुहा–४ बलियामे यातायात व्यवस्था सेवा कार्यालयके उदघाटन करले बटै ।
शुकके रोज एक कार्यक्रमके बीच शाहसे सेवा कार्यालयके उदघाटन करल हुइट । कैलालीके पूर्ववर्ती क्षेत्रके जनताहे सेवा उपलब्ध कराइक लाग बलियामे सेवा कार्यालय स्थापना करल हो ।
उदघाटन समारोहहे सम्बोधन करटी मुख्यमन्त्री शाह जनताहे सेवा प्रवाह करेक लाग प्रदेश सरकार कतिबद्ध हुके लागल बटैलै । उहाँ यातायात व्यवस्था सेवा कार्यालयके स्थापनासंगे यी क्षेत्रके जनतासे राहतके अनुभूति कैनामे विश्वास व्यक्त करलै । “जनप्रतिनिधिहुक्रे जनतासे डेहल जनमतके सम्मान करटी जनताप्रति उत्तरदायी ओ जवाफदेही हुई परठ,“ मुख्यमन्त्री शाह कहलै, “मुलुकके विकासके लाग तिनु तहके सरकारबीच समन्वय, सहकार्य ओ सह–अस्तित्व हुई परठ ।“ यी क्षेत्रके विकासके लाग चालु आर्थिक वर्षमे प्रदेश सरकारसे १ अर्ब बराबरके बहुवर्षीय ठेक्का स्रोत सुनिश्चित करल मुख्यमन्त्री शाह कार्यक्रममे जानकारी डेलै ।
लम्कीचुहा प्रादेशिक अस्पतालके लाग चालु आर्थिक वर्षमे प्रदेश सरकारसे साढे ४ करोड रुप्या विनियोजन करल जानकारी डेटी उहाँ यी वर्ष सञ्चालनमे आइ नैसेकल रकम फ्रिज हुके जैना बटैलै ।
लम्कीचुहा प्रादेशिक अस्पताल सञ्चालनके लाग आवश्यक परल कानुनसम्मत रूपमे लचकता अपनैना प्रदेश सरकार तयार रहल उहाँ बटैलै । यी क्षेत्रके नागरिकहे सहज स्वास्थ्य सेवा उपलब्ध करैना उद्देश्यसे अपने निरन्तर प्रयासरत रहल ओ उहे अनुरूप कानुनी दायराभिटर रहिके आवश्यक लचकता अपनैनाफे तयार रहल उहाँक कहाई रहे ।
टिकापुरमे प्रस्तावित टीकापुर विज्ञान तथा प्राविधिक विश्वविद्यालय निर्माणके लाग सक्कु पक्ष एकजुट हुके लागेपर्नामे जोड डेलै उहाँ आधुनिक प्रविधिके युगमे विश्व बजारसँग प्रतिस्पर्धा कैना सक्षम जनशक्ति उत्पादन आवश्यक रहल बटैलै । उ विश्वविद्यालयसे क्षेत्रीय पहिचान स्थापित कैना महत्वपूर्ण भूमिका खेल्न विश्वासफे उहाँ व्यक्त करलै ।
सेवा कार्यालय स्थापनासंगे लम्कीचुहा नगरपालिका, मोहन्याल गाउँपालिका, जानकी गाउँपालिका, टिकापुर नगरपालिका, जोशीपुर गाउँपालिका ओस्टेक करके बर्दगोरिया गाउँपालिका लगायतके क्षेत्रके जनताहे सहजता हुई ।
कार्यालय व्यवस्थापनके लाग स्थानीय झुप्रे रावतसे ५ बर्षके लाग आपन घर निःशुल्क उपलब्ध करैले बटै । लम्कीचुहा नगरपालिका वडा नम्बर ४ के वडा अध्यक्ष ताराप्रसाद अधिकारीके सभापतित्वमे हुइल कार्यक्रमके सञ्चालन वडा नम्बर ३ के अध्यक्ष लवबहादुर शाही करल रहिट ।
