सुदूरपश्चिम ११ ओ सुर्मादेवी च्याम्पीयन
पहुरा समाचारदाता
धनगढी, ६ कुँवार । कैलालीके कैलारी गाउँपालिका वडा नम्बर ४ के गाउँमे हुइल २४ औं निसर्ग हस्पिटल महिला तथा पुरुष फुटबल प्रतियोगितामे पुरुष ओरके उपाधि सुदुरपश्चिम ११ स्पोर्टस क्लब जिट्ले बा कलेसे महिला ओरके उपाधि सुर्मादेवी युवा क्लब हात परले बा ।
न्यु युवा सुन्दर शक्ति युवा क्लबके आयोजनामे थारु समुदायके टिुहवार अँट्वारी ओ तीजके अवसरमे हुइल महिला तथा पुरुष फुटबल प्रतियोगिता अन्तर्गत पुरुष ओरके े फाईनलमे सिआउर सेभेन फुटबल क्लबहे १–० से हरैटी सुप ११ ले उपाधि जिटल हो । उपाधि जिटाइक लाग निर्णायक गोल सुप ११ के लाग भरत टमाटा गोल करल रहिट । उपाधिसँगे सुप ११ नगद एक लाख सहित ट्रफी पैले बा कलेसे उपविजेता सिआउर सेभेन नगद पचास हजार सहित ट्रफी प्राप्त करले बा ।
पुरुष ओर सिआउर सेभेनके किरण योगी सर्वोकृष्ट खेलाडी बनल बाटै कलेसे सुप ११ के भरत टमाटा सर्वाधिक गोलकर्ता ओ सुप ११ के आकाश बुढा उत्कृष्ट गोलरक्षक हुइल बाटै ।
महिला ओरके उपाधि सुर्मादेवी युवा क्लब जिट्ले बा । फाईनलमे सुर्मादेवी युवा क्लब पटेला स्मार्ट क्लबहे टाईब्रेकरमे किराना लगैटी उपाधि जिटल हो । निर्धारित समयमे डुनु टोली १–१ के बराबरी खेलल् रहिट । सुर्मादेवीके लाग विर्सना चौधरी ओ पटेलाके लाग ममता पुन मगर गोल करल रहिट ।
टाईब्रेकरमे सुर्मादेवीसे पटेलाहे ३–१ से हरैटी उपाधि जिटल हो । सुर्मादेवीके लाग शिवागी स्नेही, विपना स्नेही ओ अस्मिता चौधरी गोल करली कलेसे विर्सना चौधरी ओ धना बोहोराके प्रहार गोलमे परिणत हुइ नैसेकल । ओस्टके पटेलाके लाग कमला विष्टके प्रहार किल गोल हुइल रहे । ममता पुन मगर, नैना बोहोरा ओ अनिषा कुँवर गोल करे नैसेकल रहिट ।
महिला ओकरे विजेता हुइल सुर्मादेवी नगद २५ हजार सहित ट्रफी पैले बा कलेसे उपविजेता पटेला नगद १५ हजार सहित ट्रफी पैले बा ।
