घोडाघोडी ओ शुक्लाफाँटा ब्ल्याकबक्स विजयी

पहुरा समाचारदाता
धनगढी, १९ अगहन । कैलालीके धनगढीमे जारी लिटल फ्लावर प्रिमियर लिग (एलपिएल) के आठौँ संस्करण अन्तर्गत टिसरा दिन सम्पन्न दुई खेलमे घोडाघोडी क्रिकेट एकेडेमी ओ शुक्लाफाँटा ब्ल्याकबक्स फाउण्डेसन विजयी हुइल बा ।

समुह ’सी’ अन्तर्गतके मंगरके पहिल खेलमे कैलालीके घोडाघोडी क्रिकेट एकेडेमी सुदूरपश्चिमाञ्चल एकेडेमीहे ४ विकेटसे पराजित कैटी विजयी सुरुवात करल रहे । प्रतियोगितामे सुदूरपशिचमाञ्चलके इ डुसरा हार हो ।

सुदूरपश्चिमाञ्चलसे डेहल १११ रनके लक्ष्य घोडाघोडी १६.५ ओभरमे ६ विकेट गुमाके पुरा करल रहे । घोडाघोडीके ब्याटिंगमे ओपनर बिपिन बिक्रम शाही सर्वाधिक ३१ रन योगदान डेहल रहिट । सञ्जय बोहरा २२ तथा कृष कार्की २० रन बनाइल रहिट । ८१ रनमे ६ विकेट गुमल अवस्थामे सञ्जय ओ कृष अविजित ३२ रनके साझेदारी कैटी जितसम पुगाइल रहिट ।

सुदूरपश्चिमाञ्चलके बलिंगमे बिरेन्द्र चन्द ओ पारस सुनार २÷२ तथा सौर्य श्रेष्ठ ओ निसान रेग्मी १÷१ विकेट लेहल रहिट ।
उहीसे आघे टस जितके ब्याटिंग करल सुदूरपश्चिमाञ्चल एकेडेमी १८.५ ओभरमे ११० रनमे सक्कु विकेट गुमाइल रहे ।

सुदूरपश्चिमाञ्चलके लाग आशिष लुहार सर्वाधिक ४२ रन योगदान डेलै जौन क्रममे उहाँ ३६ बलमे १ चौका ओ ४ छक्का प्रहार करल रहिट । सन्दिप बिष्ट २७ तथा किरण कार्की १४ रन बनाइल रहिट ।

घोडाघोडी क्रिकेट एकेडेमीके हरिश बस्नेत अकली ४ विकेट लेलै जौन क्रममे ४ ओभरमे २२ रन खर्चल रहिट । ओस्टके सञ्जय बोहरा ३ विकेट लेलै कलेसे कृष कार्की २ तथा भुपेश जोशी १ विकेट लेहल रहिट । खेलके प्लेयर अफ द म्याच अलराउण्ड योगदान लेहल सञ्जय बोहरा घोषित हुइल रहिट ।

डुसरा खेलमे समुह ’ए’ अन्तर्गत शुक्लाफाँटा ब्ल्याकबक्स फाउन्डेसन विजयी सुरुवात कैना क्रममे खप्तड इन्डोर स्पोर्ट्स ट्रेनिंग सेन्टरहे ११२ रनके विशाल अन्तरसे पराजित करले बा ।

शुक्लाफाँटासे डेहल १७७ रनके लक्ष्य पछ्याइल खप्तड इन्डोर १५.१ ओभरमे ६४ रन किल बनाइल रहे । खप्तडके लाग पुकार चन्द १३ तथा प्रकाश पाण्डे १२ रन बनैना बाहेक अन्य ब्याटर दोहोरो अंकमे रन बनाइ नैसेकल रहिट ।

खप्तडहे सस्तोमे सिमित कैना शुक्लाफाँटाके दायाँ हाते पेसर कैलाश ऐर अकली ५ विकेट लेहल रहिट । प्लेयर अफ द म्याच घोषित ऐर ३.१ ओभरमे १५ रन खर्चल रहिट । सुशील रावल, भरत चन्द, बसन्त खत्री ओ सुरज तिरुवा १÷१ विकेट लेहल रहिट ।

टस हारके ब्याटिंग करल शुक्लाफाँटा ब्ल्याकबक्स फाउन्डेसन २० ओभरमे ९ विकेट गुमाके १७६ रन बनाइल रहे ।
शुक्लाफाँटाके लाग ओपनर अशोक बिष्ट सर्वाधिक ४१ रन योगदान डेलै जौन क्रममे उहाँ ३५ बलमे ६ चौका प्रहार कल रहिट । किरान ठगुन्ना २२ बलमे ४ चौका ओ २ छक्काके मद्दतसे ३५ रन बनाइल रहिट । बसन्त खत्री २३ तथा लोकेश जोशी २० रन बनाइल रहिट ।

खप्तड इन्डोर स्पोर्ट्सके बलिंगमे रवि बिष्ट सर्वाधिक ३ विकेट लैले जौन क्रममे ३ ओभरमे २१ रन खर्चल रहिट । प्रकाश पाण्डे २ तथा मुकेश बिष्ट, नगेन्द्र उपाध्याय ओ दिपक टमाटा १÷१ विकेट लेहल रहिट ।

प्रतियोगिता अन्तर्गत चौंथो दिन फेन दुई खेल हुइना जनाइल बा । पहिल खेल सकारे ९ बजे आयोजक लिटल फ्लावर ओ घोडाघोडी क्रिकेट एकेडेमी बीच तथा डुसरा खेल १ बजे कैलाली जिल्ला क्रिकेट क्लब ओ खप्तड इन्डोर स्पोर्ट्स ट्रेनिंग सेन्टर बीच हुइना जनाइल बा ।

लिटल फ्लावर स्पोर्टस् क्लबके आयोजनामे सुरु हुइल प्रतियोगिताके इ आठौँ संस्करण हो । प्रतियोगिताके उपाधि विजेता दुई लाख ५५ हजार ओ उपविजेता एक लाख २८ हजार रुपैयाँ पुरस्कार पैना बाटै । प्रतियोगितामे काठमाडौँ, रौतहट, दाङ, कैलाली ओ कञ्चनपुरके १६ टीमके सहभागिता रहल बा ।