कैलारी गाउँपालिका–७ के सार्वजनिक सुनुवाई कार्यक्रम

पहुरा समाचारदाता
हसुलिया, ९ असार । कैलारी गाउँपालिका वडा नम्बर ७ के चालु आर्थिक बर्षके सार्वजनिक सुनुवाई कार्यक्रम बुधके रोज सम्पन्न हुइल बा ।

स्थानीय सरकार ओ नागरिकहुकनके बीचमे दोहोरो सम्वाद स्थापित कैना, सम्वादसे जनताहे स्थानीय विकासके प्रक्रियामे रचनात्मक प्रतिनिधित्व कराके पारदर्शिताके माध्यमसे स्थानीय विकास निर्माण कार्य ओ सेवा प्रवाहहे गुणस्तरीय, प्रभावकारी बनाइक लाग वडा नम्बर ७ के चालु आर्थिक बर्ष २०८०÷०८१ के सुनुवाई कार्यक्रम हुइल हो ।

वडा नम्बर ७ के वडा अध्यक्ष दिपेन्द्रबहादुर बमके अध्यक्षतामे हुइल कार्यक्रममे उहाँ वडामे रहल सीमित बजेटहे गाउँबस्तीके माग अनुसार प्रथामिकीकरण करटी आघे बह्रल बटैलै ।

वडा कार्यालयमे सिमित बजेट रहे, उहाँ कहलै, ‘जनताके आपेक्ष ढेर रहे, मने देशमे हुइल आर्थिक मण्डीके कारण बजेटमे कटौटी हुइल ओरसे ठप योजनाके काम आघे बह्राई नैसेकल हो । ढेर बजेट रहलेसे जनताके ढेर माग पुरा करे सेक्जाइठ । जटरा बजेट रहठ उहीहे समन्वय करके आघे बह्रल बटी ।’

कार्यक्रममे वडा सचिव गणेश चौधरी डा कार्यालयसे चालु आर्थिक बर्षमे कैगिल प्रगती, विकासके काम, बजेट, राजश्व संकलनलगायतके गतिविधि प्रस्तुतीकरण करल रहिट । सार्वजनिक सुनुवाई कार्यक्रममे पूर्व वडा अध्यक्ष कमल चौधरी, नेकपा एमाले पार्टीके प्रदेश सदस्य चन्द्रिका चौधरी, बडका बसन्ताके भल्मल्सा बाबुराम चौधरी, मोहनपुरके भल्मन्सा जागुराम चौधरी, सहकारी ओरसे नाथुराम चौधरीलगायत जिज्ञाशा ओ वडा कार्यालयके सुझाव डेहल रहिट ।

कार्यक्रममे कार्यपालिका सदस्य सुन्दरी चौधरी, वडा सदस्य टुन्नीराम चौधरी, आरती विक, स्थानीय, भल्मन्सा यूवा क्लव, विद्यालय व्यवस्थापन समितिके अध्यक्ष, टमान राजनितिक दल, महिला स्वास्थ्य स्वयं सेविका लगायतके सहभागिता रहे । कार्यक्रममे स्वागत मन्तव्य वडा सदस्य टुन्नीराम चौधरी करल रहिट ।

सार्वजनिक सुनुवाई कार्यक्रम कैलारी गाउँपालिका वडा नम्बर ७ के वडा कार्यालयके आयोजना तथा पहुरा मिडिया प्रालिके सहजीकरणमे हुइल हो ।