हुलाकीके कारण मन्कापुर जलमग्न, रातके १२ बजे १० जानेक उद्धार

पहुरा समाचारदाता
हसुलिया, २४ असार । गाउँघर जलमग्न हुइलपाछे कैलालीके कैलारी गाउँपालिका–५ मन्कापुरके १०जानेक रातके १२ बजे उद्धार कैगिल बा ।

कटैनी लडियाके बाढ उपटके मन्कापुर गाउँ पैठल ओ हुलाकी सडकके कारण पानी निकास नैहुइलपाछे मन्कापुर डुबानमे परल हो । रातके समयमे पानीके सतह बह्रटी गैलपाछे डेढ महिनक एक जाने सुत्केरीसहित १० जाने उद्धार करल कैलारी गाउँपालिका विपत व्यवस्थापन शाखाके विपद फोकल पर्सन भुवन बखरिया बटैलै ।

उहाँ कहलै, ‘रातके १२ बजे ओर कटैनी लडिया पानी उपटके गाउँ जलमग्न हुइल खबर आइलपाछे नेपाल प्रहरी सशस्त्र प्रहरीके टोलीसे रबर बोटके माध्यमसे उद्धार करके सुरक्षित स्थानमे ल्यानगिल रहे ।’

ओस्टेक करके कैलारी गाउँपालिका ५ पवेराके एक दर्जनसे ढेर घरमे पानी पेलल बा ।