कैलाली पूर्ण खोप सुनिश्चितता घोषणा

१६ से ५९ महिनाके ३६ हजार ९१६ बालबालिका पूर्ण खोप प्राप्त करलै

पहुरा समाचारदाता
धनगढी, ३१ असार । कैलाली जिल्ला पूर्ण खोप सुनिश्चितता घोषणा हुइल बा । आर्थिक बर्ष २०८०÷०८१ सालमे १३ स्थानीय तहके १६ से ५९ महिनाके ३७ हजार ४ सय ६२ जाने बालबालिका मन्से ३६ हजार ९१६ बालबालिका पूर्ण खोप प्राप्त करलपाछे अँटवारके रोज एक कार्यक्रमके विच कैलाली जिल्लाहे पूर्ण खोप सुनिश्चितता घोषणा कैगिल हो ।

जिल्ला स्वास्थ्य कार्यालय कैलालीमे वरिष्ठ जनस्वास्थ्य अधिकृत आसुुतोष श्रेष्ठके अनुसार कैलालीमे शुन्य डोजमे संख्या ११ जाने बालबालिका, खोपसे छुट रहल संख्या ४ सय ४८ जाने उहाँ बटैलै । खोपसे बञ्चित हुइना मुख्या कारण बसाई सराई रहल उहाँ जनैलै ।

कैलाली जिल्लाके १३ स्थानीय तह रहलमे कैलारी गाउँपालिकामे शत प्रतिशत बालबालिका खोप लगैले बटै । जहाँ २४ सय ८१ जाने बालबालिका रहलमे सक्कु जाने खोप सक्कु खोप प्राप्त करले बटै ।

मोहन्यालमे ११ सय १७ जाने बालबालिका रहलमे सक्कु जाने खोप लगाइल मने ९ जाने बालबालिका अक्कोफे खोप नइपाके ड्रोप आउट डेखल बा । चुरे गाउँपालिकामे ३ सय बालबालिका रहलमे सक्कु खोप प्राप्त करल मने अक्कोफे खोप नइपाके ड्रोप आउट डेखल संख्या १ जाने, गोदावरी नगरपालिकामे ३६ सय २७ जाने बालबालिका रहलमे ३५ सय ७९ जाने खोप लगाइल, अक्कोफे खोप नइपाके ड्रोप आउट डेखल संख्या ४८ जाने रहल जनागिल बा ।

गौरीगंगा नगरपालिकामे ३२ सय ८६ जाने बालबालिका रहलमे ३१ सय ९८ जाने पूर्ण खोप प्राप्त करलै, खोप नइपाके ड्रोप आउट संख्या ३९ जाने रहल बटै । घोडाघोडीमे ४५ सय ८२ जाने बालबालिका रहलमे ४३ सय ७६ जाने पूर्ण खोप प्राप्त करलै, कलेसे ८६ जाने बालबालिका ड्रोप आउट डेखल बटै ।

बर्दगोरिया गाउँपालिकामे १८ सय ६७ बालबालिका रहलमे सक्कु जाने पूर्ण खोप पाइल मने ३० जाने ड्रोप आउट डेखल बटै । लम्कीचुहा नगरपालिकामे १३ सय बालबालिका रहलमे १२ सय ९४ जाने पूर्ण खोप पाइल, दुई शुन्य डोज ओ ४६ जाने ड्रोप आउट डेखल बटै ।

जानकी गाउँपालिकामे २३ सय ७७ बालबालिका रहलमे २३ सय ७५ जाने पूर्ण खोप प्राप्त करलै । जहाँ ४ जाने ड्रोप आउट डेखल बटै । जोशीपुरमे १५ सय २ जाने बालबालिका रहलमे सक्कु जाने पूर्ण खोप प्राप्त करलै । कलेसे २२ जाने ड्रोप आउट विल्गाइल बटै ।

ओस्टेक करके टीकापुर नगरपालिकामे ४६ सय ६७ जाने बालबालिका रहलमे सक्कु जाने पूर्ण खोप प्राप्त करलै, कलेसे ३४ जाने ड्रोप आउट डेखल बटै । भजनी नगरपालिकामे २३ सय ५४ जाने बालबालिका रहलमे २२ सय ६० जाने बालबालिका पूर्ण खोप प्राप्त करलै, जहाँ ३१ जाने ड्रोप आउट डेखल बटै । धनगढी उपमहानगरपालिकामे ८ हजार २ जाने बालबालिका रहलमे ७ हजार ९ सय बालबालिका पूर्ण खोप प्राप्त करलै, कलेसे ९८ जाने ड्रोप आउट डेखल जिल्ला स्वास्थ्य कार्यालय कैलालीमे वरिष्ठ जनस्वास्थ्य अधिकृत प्रमुख श्रेष्ठ जनैलै ।

राष्ट्रिय तथ्यांक हेरेबेर १६ प्रतिशत बालबालिका पूर्ण खोप पैले नैहुइट, कलेसे ४ प्रतिशत बालबालिका अक्कोफे खोप नैपाइल हुइट । खोप लगैनामे अब्बेक चुनौतीमे खोप कभरेज कम हुइना, सक्कु तहमे कभरेजमे एकरुपता नइहुइना, ड्रप आउट ढेर हुइना, शुन्य डोज खोपके संख्या बह्रटी जैना रहल स्वास्थ्य प्रमुख बटैलै ।

नियमित खोप सेवामे खोप छुट हुइना कारण प्रभावकारी परामर्शके अभाव, सेसन नियमित संचालन नइहुइना, संचालन मिति ओ समय निश्चित नैहुइना, चाडपर्वके कारण खोप सेसन नइचल्ना वा बच्चा नइअइना, बच्चा विरामी हु्इलमे, खोप सेसनमे प्रर्याप्त खोप तथा खोप सामाग्री नैहुइना, खोपके पूरा मात्रा लेनाबारे अभिभावकमे जानकारीके कमि, भौगोलिक विकटता वा खोप सेसन पायक नइहुइना रहल उहाँ बटैलै ।

कैलाली जिल्लाहे सबसे पहिले आर्थिक बर्ष २०७४÷०७५ के २०७४ अगहन २६ गते पूर्ण खोप सुनिश्चितता जिल्ला घोषणा करल रहे । आर्थिक बर्ष २०७७÷०७८ के २०७८ बैशाख मसान्तमे यी जिल्लाके १० स्थानीय तहहे केल पूर्ण खोप सुनिश्चितता घोषणा करल रहे ।

ओस्टेक करके आर्थिक बर्ष २०७८÷७९ साल ओ आर्थिक वर्ष २०७९÷२०८० सालमे पूर्ण खोप सुनिश्चित जिल्ला घोषणा करल रहे । जिल्ला खोप समन्वय समितिके संयोजक तथा जिल्ला समन्वय समितिके कार्यवाहक सभापति खगराज भुषालके अध्यक्षतामे हुइल कार्यक्रममे स्वास्थ्य महिला तथा बालबालिका मन्त्री ओम विक्रम चन्द रहल रहिट ।

कार्यक्रममे सम्बोधन करटी उहाँ महिला स्वास्थ्य स्वयं सेविकाहुकनहे अहम भूमिका रहल बटैलै । ‘हमार प्रथामिकता स्वास्थ्य हो,’ मन्त्री चन्द कहलै, ‘मने भौतिक पूर्वाधारमे ढेर ध्यान डेहल डेखल बा । स्वास्थ्य रहेक लाग अपने लागफे कुछ समय छुई पर्ना डेखल बा ।’

सरकार फेरठ मने हमार कार्यक्रम फेरे नइपरल मन्त्री कहलै, ‘नइसर्ना रोग बह्रटा ओहोर ओर ध्यान डेहे पर्ना जरुरी बा ।’
कार्यक्रममे महिला स्वास्थ्य स्वयं सेविका अम्बिका भण्डारी, घोडाघोडा नगरपालिकाके नगर प्रमुख खडकबहादुर रावत, जानकी गाउँपालिकाके अध्यक्ष गणेश चौधरीलगायत मन्तव्य व्यक्त करल रहिट । कार्यक्रममे १३ स्थानीय तहहे पूर्ण खोप सुनिश्चितताके प्रशंसा पत्र हस्तान्तरण कैगिल बा ।