मोहना नदि जलाधर क्षेत्र अन्र्तगत स्थानीय तहके समन्वय बैठक
पहुरा समाचारदाता
हसुलिया, ६ सावन । कैलारी गाउँपालिकाके आयोजना तथा नेपाल रेडक्रस सोसाइटीके सहयोगमे अँटवारके रोज हसुलियामे मोहना नदि जलाधर क्षेत्र अन्र्तगत स्थानीय तहके समन्वय बैठक हुइल बा ।
कैलारी गाउँपालिकाके अध्यक्ष राजसमझ चौधरीके अध्यक्षतामे हुइल कार्यक्रममे भजनी नगरपालिकाके नगर उपप्रमुख राजु तिरुवा, जोशीपुर गाउँपालिकाके अध्यक्ष चित्रबहादुर चौधरी, उपाध्यक्ष रेखा कठरिया, जानकी गाउँपालिका ओ टीकापुर नगरपालिकाके वडाहुक्रे, कार्यपालिका सदस्यहुक्रे कैलारी गाउँपालिकाके प्रमुख प्रशासकीय अधिकृत खगेन्द्रराज जोशीलगायतके सहभागिता रहल रहे ।
मोहना नदि जलाधर क्षेत्र अन्र्तगत स्थानीय तहके समन्वय बैठकमे विपदके बेला यी स्थानीय तह बाढ प्रकोपके उच्च जोखिममे रहल ओरसे समन्वय करके आघे बह्रे पर्ना कैलारी गाउँपालिकाके अध्यक्ष राजसमझ चौधरी बटैलै । उहाँ कहलै, ‘कैलारी गाउँपालिका मोहना, कटैनी, घुरहा लडियाके कारण डुबान हुइटी रहल बा । कैलारी जस्टे भजनी, जोशीपुर, जानकी ओ टीकापुरफे बाढ प्रकोपके समस्या झेल्टी आइल बा । कार्यक्रममे सहभागिता स्थानीय तहके प्रतिनिधिहुक्रे आ–अपन पालिकाके झेल्टी समस्याबारे अनुभव साटासाट कैगिल रहे ।
कार्यक्रमके संचालन कैलारी गाउँपालिकाके सामाजिक विकास शाखा प्रमुख यगम कलेल रहिट । मोहना नदि जलाधर क्षेत्र अन्र्तगत स्थानीय तहके समन्वय बैठकमे विपदके बेला तिनु स्थानीयमे पुगैटी रहल क्षतिबारे छलफल कैगिल कैलारी गाउँपालिकाके प्रवक्ता तथा वडा नम्बर ७ के वडा अध्यक्ष दिपेन्द्रबहादुर बम बटैलै ।
