डब्लुएचआरसे मानव अधिकार आयोग प्रमुखके विदाई कार्यक्रम
पहुरा समाचारदाता
धनगढी, ६ सावन । सुदूरपश्चिम प्रदेश कार्यालयमे कार्यरत रहल राष्ट्रिय मानव अधिकार आयोगके प्रमुख हरि प्रसाद ज्ञवाली सरुवा हुके लुम्बिनी प्रदेश जैटी रहल ओरसे मानव अधिकारका लागि महिला एकल महिला समुह सुदूरपश्चिम प्रदेशसे शनिच्चरके रोज एक कार्यक्रमके विच विदाई कार्यक्रम कैगिल बा ।
धनगढी उपमहानगरपालिकाके नगर उपप्रमुख कन्दकला रानाके प्रमुख आतिथ्यमे हुइल कार्यक्रममे उहाँ मानव अधिकारके क्षेत्रमे आयोगके प्रमुख हरिप्रसाद ज्ञवाली ज्यूके योगदान मजा रहल बटैली । उहाँ कहली, ‘अब्बे भौतिक पूर्वाधारमे विकास हुइल बा कलेसे उहीहे विकास ठन्ना मानसिकता बैठल बा । मानविय विकास नइहुइल कारण समाजमे कल्पना नैकरल घटना, दुर्घटना, मानव अधिकार उल्लंघनके घटना बह्रल टबमारे मानविय विकास, सामाजिक विकासहे संगसंगे लैजाई पर्ना जरुरी बा । समाजमे एकल महिला, द्वन्द पीडित, विपन्न समुदायके महिलाहुकनके अवस्था नाजुक बा । ओइनके सहयोग ओ मायाके आवश्यकता रहठ । राज्यसे ओइनके माग ओ समस्या सुनुवाई कैनाफे जरुरी बा ।’
कार्यक्रममे आयोगके प्रमुख ज्ञवाली सुदूरपश्चिमके बैठाईमे मानव अधिकारके क्षेत्रमे कार्यरत संघ संस्था, डब्लुएचआरकर्मीनके सहयोग, समन्वय ओ सहकार्य मजा रहल बटैलै । उहाँ कहलै, ‘मोर यहाँके बैठाई सदा यादगार रही, कामके शिलशिलामे एक ठाउँसे दुसर ठाउँ गैलेसेफे संस्थागत ओ व्यक्तिगत सम्बन्ध, सहयोग ओ सुझाव सदा रही ।’
कार्यक्रममे मानव अधिकारके क्षेत्रमे कार्यरत मानव अधिकारकर्मीहुकनके सहभागिता रहल रहे । कार्यक्रमके संचालन मानव अधिकारका लागि महिला एकल महिला समुह सुदूरपश्चिम प्रदेश कार्यालयके शान्ति परियोजना संयोजक वेद अवस्थी करल रहिट । यिहे सवनिया खिर खैना कार्यक्रमके आयोजनाफे कैगिल रहे ।
