सौर्य जहाज दुर्घटनामे १८ जनहनके मृत्यु, पाइलटके उद्धार
पहुरा समाचारदाता
काठमाडौँ, ९ सावन । त्रिभुवन अन्तर्राष्ट्रिय विमानस्थलके धावन मार्गसे सौर्य एयरलाइन्स उर्टी किल दुर्घटना होके १८ जनहनके मृत्यु हुइल बा । मृतक सक्कु जाने सौर्य एयरलाइन्सके कर्मचारी हुइट । उहाँहुक्रनके शव त्रिवि शिक्षण अस्पतालमे राखल बा ।
पाइलट मनिषरत्न शाक्यके भर काठमाडौंके सिनामंगलस्थित केएमसी अस्पतालमे उपचार हुइटी रहल बा । अस्पतालके चिकित्सक डा। विशद दाहाल उहाँके शरीरमे टमान भागमे चोटपटक लग्नाके साथे मुहसे रगत आइल ओरसे उहाँके आकस्मिक उपचार कक्षमे उपचार हुइटी रहल जानकारी डेलै ।
उहाँ कहलै, “उहाँके शरीरमे जलन नैहो मने शरीरके टमान भागमे चोट लग्नाके साथे मुहसे फेन रगत बहल ओरसे हाल अस्पतालके आकस्मिक उपचार उपचार कक्षमे उपचार हुइटी बा । थप उपचारपाछे किल उहाँ कत्रा गम्भीर बाटै कहिके कहे सेकजाइ ।”
बुधके करिब ११ ः११ बजे सौर्य एयरलाइन्सके जहाज पोखरा उर्ना क्रममे रनवेसे दुर्घटनामे परल रहे । उर्टी किल दाहिन ओर मोर्टी रनवेके पुरुबओर रहल स्थानमे दुर्घटना हुइल रहे । दुर्घटना हुइल जहाज विमानस्थलमे राखल एक कन्टेनरहे ठक्कर डेटी उछिट्टी आके भुँइयामे बजारल रहे ।
विमानमे चालक दलके सदस्य सहित १९ जाने सवार रहिट । विमानमे को–पाइलट सुशान्त कटुवाल, अमित मान महर्जन, सगर आचार्य, दिलीप बर्मा, मनुराज शर्मा, अश्विन निरौला, सुदिप लाल जोशी, सर्वेश मरासिनी, श्याम बिन्दुकार, नवराज आले, राजाराम आचार्य, प्रिजा खतिवडा, अधिराज शर्मा, उद्धव पुरी, यज्ञ प्रसाद पौड्याल, सन्तोष महतो, पुण्य रत्न शाही ओ आरिफ रेडा सवार रहिट ।
सौर्य एयरलाइन्सके दुर्घटनाग्रस्त जहाज इन्जिन परीक्षणके लाग पोखरा जैटी रहल जनाइल बा । उ जहाजके इन्जिनके पूर्ण मर्मत ९सी–चेक०के लाग पोखरा जैना क्रममे रहे । जहाज पोखरास्थित ह्यांगरमे एक महिना राखके मर्मत कैना तयारी रहे ।
