पहिरोमे परके चार जानेक ज्यान गैल

प्रदेश सरकार प्रतिव्यक्ति एक लाख रुप्याके राहत डेना घोषणा

पहुरा समाचारदाता
धनगढी, ३ भदौ । अविरल बर्षाके कारण सोम्मार रात १ बजे पहिरोसे भँठके बझाङ जिल्लाके बुङगल नगरपालिका वडा नं. १० टुमेडागाउँ बैठना चार जानेक ज्यान गैल बा ।\

विरबहादुर धामीके घरेक उप्पर पहिरो गिरके हुकान गोसिनीया बर्ष ५५ के काली धामी, बरकी पटुहिया बर्ष २५ के गोल्की धामी, नातिनीयाहुँक्रे बर्ष ६ के आकृती धामी ओ बर्ष ३ के लक्ष्मी धामी ज्यान गुमैले बटी ।

सुदूरपश्चिम प्रदेशके मुख्यमन्त्री कमलबहादुर शाह सोम्मारके रोज शोक बक्तव्य जारी कैटी उ घटनामे परके ज्यान गुमुइया सक्कु जाहनमे हार्दिक श्रद्धाञ्जली ओ परिवारप्रति समवेदना व्यक्त कैटी मृतकके परिवारहे प्रतिव्यक्ति एक लाख रुप्या राहत स्वरुप प्रदान कैना घोषणा करले बटै । साथे तत्काल उद्धार तथा राहत कार्यमे संलग्न हुइना सम्बन्धित निकायहे निर्देशन डेटी उ घटनामे परके घाहिलहुँक्रन शीघ्र स्वास्थ्य लाभके कामना करले बटै ।