बाढ पीडितके उद्धारमे खटगिल गाउँपालिका अध्यक्ष नेतृत्वके टोली

पहुरा समाचारदाता
हसुलिया, ५ भदौ । अविरल बर्षाके कारण कैलाली जिल्लाके कैलारी गाउँपालिका वडा नम्बर ५ स्थित पुरान मन्कापुर, बंगलीपुर, वडा नम्बर ७ के छटकपुर बसन्ता ओ वडा नम्बर ८ के भंगहामे घर डुबानमे. परलपाछे गाउँपालिका अध्यक्ष नेतृत्वके टोली बाढ पीडितके उद्धारमे खटगिल बा ।

गाउँपालिका अध्यक्ष राजसमझ चौधरी, वडा नम्बर ४ के वडा अध्यक्ष ठागुराम चौधरी, वडा नम्बर ५ के वडा अध्यक्ष विष्णुप्रसाद चौधरी, प्रमुख प्रशासकीय अधिकृत खगेन्द्रराज जोशी, सामाजिक विकास प्रमुख यगम कलेल, योजना शाखा प्रमुख सन्तोषकुमार चौधरी, स्वास्थ्य शाखा प्रमुख नरेश चौधरीलगायत टोली प्रहरीसे बाढ पीडितहुकनके उद्धारमे खटल कैलारी गाउँपालिकाके विपद व्यवस्थापन शाखाके प्रमुख तथा विपद फोकल पर्सन भुवन बखरिया बटैलै ।

कैलाली कैलारी गाँउपालिका वडा नं ५ पुरानो मनिकापुर बैठना बर्ष ४० की आसि देवी चौधरी, बर्ष ५० की समली चौधरी, बर्ष ५५ के सितल देवी चौधरी, बर्ष ६८ के सान्ताराम चौधरी, बर्ष ७० के टिकाराम चौधरी, बर्ष ५१ को रामजशनी चौधरी, बर्ष ९ के रुनम चौधरी, बर्ष १० के साहिल चौधरी, बर्ष ७० के सुरनी चौधरी, बर्ष ७१ को कोल्ला चौधरीहे उद्धार कैगिल इलाका प्रहरी कार्यालय हसुलियाके प्रमुख लोकेन्द्र बहादुर चन्द बटैलै ।

वडा नम्बर ५ स्थित पुरान मन्कापुरमे सबसे ढेर क्षति हुइल ओ जोखिम रहल ओरसे १० जनहनहे उद्धार कैके वडा नम्बर ५ के वडा कार्यालयके धारगिल उहाँ बटैलै । उहाँ कहलै, बाढके जोखिममे रहल उद्धारके करके ल्यानल १० जानेक वडा कार्यालयके खैना बैठना व्यवस्था मिलाइल बा, और बाढ पीडितके लाग सुख्खा खानपिनके व्यवस्था मिलाजैटी बा ।’

पुरान मन्कापुरमे ३६, वंगलीपुरमे २४ घर,छटकपुर बसन्तामे २५ घर ओ भंगहामे ११ घर डुबानमे परल उहाँ बटैलै । कटैनी लडियक पानी उपटलपाछे उ बस्ती डुबानमे परल हो ।

अविरल बर्षाके कारण कटैनी लडियक बहाब बह्रके कैलारी गाँउपालिका वडा नं. ५ पुरान मनिकापुर बस्तीके २४ घरधुरीके १२६ जाने मध्ये १९ घरधुरीके ११६ जाने अपने घरके उप्पर तला ओ आफन्तके घरमे सुरक्षित साथ बैठल बटै । उ ठाउँमे बि.ओ.पि. खोनपुरसे स.प्र.ना.उ. गान्धिप राज स्याङताङके कमाण्डमे ११ जाने ओ इ.प्र.का. हसुलियासे प्र.ब.ना.नि लोकेन्द्र बहादुर चन्दके कमाण्डमे ७ जानेक टोलीफे खटल रहे ।

बाढके कारण सडक अवरुद्ध

दिनके सावा १ बजेक समयमे अबिरल बर्षाके कारण कटैनी लडियक बहाब बह्रके कैलाली कैलारी गाँउपालिका वडा नं. ५ पुरान मन्कापुर स्थित हुलाकी सडकखण्डमे पानीके बहाब बह्रके सडकके कुछ छेउमे भत्कल ओ पानीके सतह सडक उप्पर आइल ओरसे सडक पुर्ण रुपमे अवरुद्ध हुइल बा । ७ ठो सवारी साधन जाममे रहल उ ठाउँसे बि.ओ.पि. खोनपुरसे स.प्र.ना.उ. गान्धीप राज स्याङताङके कमाण्डमे ११ जाने ओ इ.प्र.का. हसुलियासे प्र.ब.ना.नि लोकेन्द्र बहादुर चन्दके कमाण्डमे ७ जानेक टोली खटल बा ।