बेलौरीके लघुवित्त लुटपाट घटनामे पक्राउ परल ८ जानेक म्याद थप
पहुरा समाचारदाता
कञ्चनपुर, १४ भदौ । कञ्चनपुरके बेलौरी बजारमे रहल दुई ठो लघुवित्तमे लुटपाट हुइल घटनामे पक्राउ परल १८ जाने मध्ये १० जाने छुटल बटै । कलेसे ८ जानेक म्याद थप करके प्रहरीसे अनुसन्धान करटी रहल बा ।
लुटपाटमे संलग्न रहल आरोपमे प्रहरी हिरासतमे कञ्चनपुर बेलौरी न पा ०६ बैठना बुझौना चौधरी, बेलौरी न पा ०८ बस्ने नन्दकली राना, कैलाशो राना, वडा नम्बर ७ बैठना गीता डगौरा, वडा नम्बर ४ बैठना चन्द्रादेवी भण्डारी, कृष्णपुर न पा ०४ बैठना गीता राना, लालझाडी गा पा ०४ बैठना रामबाबु राना, ओ बेलडाँडी गा पा ०२ बैठना अमर नेपाली (दमाई) रहल बटै ।
बिफेक रोज दुपहर बेलौरी स्थित इन्फिनिटी लघुवित्त ओ एनआइसी एसिया लघुवित्त संस्थाके कार्यालयमे एक समूह मुखमे पट्टी बाँधके प्रवेश करके वहाँ लुटपाट करल रहे । उ समूहसे कार्यालयके सरसामान तोडफोड कैनाके साथे रेकर्ड फाइल लुटके लैगिल बटाइल बा ।
घटनाके कुछ समयमे सुरक्षाकर्मी सहितके टोली परिचालन हुइलपाछे बिफे ओइनके टमान ठाउँमे नुकल अवस्थामे पक्राउ करल कञ्चनपुर प्रहरी जनैेले बा ।
पक्राउ परल १८ जानेमध्ये १० जाने छुटल बटै कलेसे ८ जाने उप्पर म्याद थप करके अनुसन्धान हुइठी रहल कञ्चनपुर प्रहरी प्रवक्ता प्रहरी नायव उपरीक्षक उमेश जोशी जानकारी डेलै । दुपहरे गुण्डागर्दी शैलीम कार्यालयमे प्रवेश करके तोडफोड तथा लुटपाट कैना उ गिरोहउप्पर कानुन बमोजिम कडा सजाय हुई पर्ना लघुवित्त संस्थाके माग रहल बा ।
