धनगढीमे फुटबल प्रशिक्षण केन्द्र निर्माणके लाग सम्झौता
पहुरा समाचारदाता
धनगढी, १५ भदौ । सुदूरपश्चिममे पहिलचो कैलालीके धनगढीमे फुलबल प्रशिक्षण केन्द्र निर्माण हुइना हुइल बा ।
सुदूरपश्चिम खेलकुद परिषद्, धनगढी उपमहानगरपालिकाके समन्वय ओ अखिल नेपाल फुटबल संघ ९एनफा० के स्वीकृतिमे धनगढीस्थित फूलबारीमे फुटबल प्रशिक्षण केन्द्र निर्माणके लाग सम्झौता हुइल बा । फुटबल खेलके विकासके लाग प्राविधिक, खेल विकासके कार्यक्रम ओ भौतिक पूर्वाधार निर्माणके कार्यक्रम सञ्चालन हुइटी आइल बावै ।
जेकर लाग प्रारम्भिक रुपमे एक लाख अमेरीकी डलर ९नेपाली १ करोड चौतिस लाख ३३ हजार० के लगानीमे फुटबल प्रशिक्षण केन्द्र निर्माण करजैना निर्णय बमोजिम अखिल नेपाल फूटबल संघके अध्यक्ष पंकज बिक्रम नेम्वाङ्ग ओ धनगढी उप महानगरपालिके प्रमुख गोपाल हमाल बिच शनिच्चरके रोज सम्झौता हुइल हो ।
कैलाली जिल्ला फुटबल संघके महासचिव ललित मिश्र धनगढी उपमहानगरपालिका–१४ डिपोबजार क्षेत्रमे प्रशिक्षण केन्द्र निर्माण कैना बटैलै । उहाँ कहलै, ‘फूलबारीके डिपो बजारके जग्गामे बनैना हुइल बा । उ उपमहानगरपालिकाके जग्गा होवइ ।’
अखिल नेपाल फुटबल संघके २०८१ भदौ ११ ओ १३ गतेके बैठकसे कैलालीमे फुटबल प्रशिक्षण केन्द्र निर्माणके लाग बजेट विनियोजन कैना निर्णय करल रहे । सुदूरपश्चिममे पहिलचो कैलालीमे फुटबल प्रशिक्षण केन्द्र निर्माणके लाग सम्झौता हुइल बा । इ प्राम्भिक चरणके काममे एक करोड ३३ लाख बजेट बिनियोजन करल बा । टेक्नीकल सेन्टर बनाइक लाग १५ से २० करोडके बिचमे लग्ना अनुमान करल बा ।
