कैलाली कारागारमे १७७ लागुऔषध मुद्दाके कैदी

पहुरा समाचारदाता
धनगढी, १५ भदौ । कैलाली जिल्ला कारागारमे लागुऔषध सम्बन्धी मुद्दाके कैदी बह्रल बाटै । कारागारमे जम्मा ५५६ कैदी रहलमे उ मध्ये १७७ जाने लागुऔषध मुद्दाके किल कैदी रहल बाटै ।

कैलाली जिल्ला अदालततके तथ्याकं अनुसार गत आर्थिक बरसमे ५३९ मुद्दा लागुऔषध सम्बन्धी दर्ता हुइल रहे । उ मध्ये ४३१ मुद्दाके सुनुवाई हुइल बा । उ मध्ये १४० जनहनहे कैद भुक्तानके लाग कैलाली जिल्ला कारागार चलान करल रहे ।
कारागारमे लागुऔषध मुद्दाके १७७ जाने मध्ये ३७ जनहनके अन्तिम सुनुवाई हुइना बाँकी रहल बा । १४० जाने लागुऔषध मुद्दामे दोषी ठहर होके कैद भुक्तान करटी रहल बाटै ।

कैलाली जिल्ला अदालतके अनुसार सम्बन्ध बिच्छेद, बैकिंङ, कसुर लागुऔषध लगायतके मुद्धाके सख्यां सबसे ढेर रहल बा । जिल्ला अदालतके प्रमुख नायाधिश दण्डपाणि लामिछाने लागुऔषधमे देशभरके ५ टप जिल्लाभिट्टर कैलाली परल बटैलै ।
खुल्ला सिमानाके कारण फेन लागुऔषध कारोबार तथा सेवनके घटनामे कमी नैआइल हुइ सेकठ् । उहाँ कहलै, ‘कारागारमे क्षमतासे ढेर मनै बाटै । फेनसे समाजमे इ अपराध काहे नै कम हुइठो रु तराइमे इ समस्या बा, कैलालीमे आउर ढेर रहल बा । खुल्ला सिमानाके कारणसे समेत हुइ सेकठ् ।’

कैलाली जिल्ला कारागारमे ४९६ पुरुष, ५८ महिला ओ २ जाने बालक कैके ५५६ जाने रहल बाटै । कारागार प्रशासनके अनुसार १५० जनहनहे कोहलपुर जेलमे स्थानान्तरण करल बा । कैलाली जिल्ला कारागारमे कैदीके संख्या ढेर हुइलपाछे उहाँहुक्रनहे कोहलपुरके नयाँ जेलमे पठाइल हो । कोहलपुर कारागार स्थानान्तरण करल कैदीमे अधिकाँस लागुऔषध मुद्दाके रहल बाटै ।