साढे चार लाखसे ढेरके भन्सार छलिके सामान बरामद

पहुरा समाचारदाता
धनगढी, १७ कुवाँर । जिल्ला प्रहरी कार्यालय कैलाली ओ ईलाका प्रहरी कार्यालय हसुलियासे खटल प्रहरी टोली टमान ठाउँसे भन्सार छलि करके भारतसे अवैध रुपमे ल्यानल सामान बरामद करले बा ।

कैलालीके टमान ठाउँसे भारतिय नाकासे भन्सार छली करके ल्यानल रु.४ लाख ६७ हजार २५० बराबरके अवैध मालसामान फेला पारके बरामद करले बा । उ आवश्यक कारवाहीके लाग भन्सार कार्यालय पठैना कार्य हुइल जिल्ला प्रहरी कार्यालय कैलालीके प्रवक्ता कविन्द्र सिंह बोहरा जनैलै ।

धनगढी उप–महानगरपालिका स्थित त्रिवेणीघाट, मनेहरा, मिलन चोक ओ ट्राफिक चौराहसे रु.३ लाख ७४ हजार ३५० बराबरके चिनी, प्याज, बुफर, बोईलर मुरगी, लेहंगा, कुर्ती, सुट, बच्चाके कपडा बरामद कैगिल बा ।

ओस्टेक करके कैलालीके कैलारी गाउँपालिका वडा नं. ०१ विसनपुरसे रु.९२ हजार ९ सय बराबरके से. १ प ३९४९ नम्बरके मोटरसाइकलसहित जुत्ता ओ चप्पल बरामद कैगिल बा ।