व्यवसाय ओ मानव अधिकारबारे अन्तरक्रिया
पहुरा समाचारदाता
धनगढी, ५ कात्तिक । व्यवसाय ओ मानव अधिकार विषय बारे यातायात व्यवसायी बिच अन्तरक्रिया कार्यक्रम हुइल बा ।
राष्ट्रिय मानव अधिकार आयोग सुदूरपश्चिम प्रदेश कार्यालयके आयोजनामे सुदूरपश्चिम प्रदेश अन्र्तगतके यातायात व्यवसायी बिच अन्तरक्रिया हुइल हो । अन्तरक्रियामे यातायात व्यवसायीहुक्रे टमान गुनासा तथा समस्या राखल रहिट ।
सुदूरपश्चिम यातायात प्रालिके पदम राज सापकोटा सरकारसे सवारी तथा यातायात व्यवस्था नियमावली कार्यान्वयन नैकरल ओरसे यातायात व्यवसायी ढेर मारमे पर्ना बटाइल रहिट । उहाँ सरकारसे उ नियमावलीहे प्रकावकारी रुपमे कार्यान्वयन नैकरल ओरसे सवारी साधन दुर्घटना हुइल बेला ढेरमारमे यातायात व्यवसायी परल बटाइल हुइट ।
उहाँ दुर्घटना हुइल बेला बीमा अथवा क्षतिपुर्ति लगायत औषधीउपचारके लाग यातायात व्यवसायी ढेर मारमे परल औँल्याइल रहिट । ओस्टके उहाँ सरकारसे सडकके स्तरोन्नति लगायत यात्रुके चापहे ध्यान डेहे पर्ना बटाइल रहिट ।
खप्तड यातायात प्रालिके अन्नत राज जोशी सरकारके लापारवाहीके कारण यातायात व्यवस्था कार्यालय ओ ट्राफिक प्रहरीहे दोहोरो जरिवाना टिरे पर्ना बाध्य रहल बटाइल रहिट ।
महाकाली यातायात प्रालिके डम्मर राज पन्त सरकारसे यातायात ओ यात्रुहे मध्यनजर कैटी रोड परमिट लागु करे पर्ना औँल्याइल रहिट । ओस्टके उहाँ चालक उपत्पादनके लाग प्राविधिक शिक्षालय ओ समय सापेक्ष सवारी तथा यातायात व्यवस्था नियमावली लाने पर्ना जोड डेहल रहिट ।
कैलाली यातायात प्रालिके तीर्थराज जोशी सरकारसे यातायात व्यवसायीहे निर्भिक, स्वतन्त्र रुपमे यातायात सञ्चालनके लाग वातावरण बनाइ पर्ना जोड डेहल रहिट । ओस्टके उहाँ अपाङ्गता रहल व्यक्ति, विद्यार्थी, वृद्धवृद्धाहे यातायातमे डेहल सहुलियतहे मध्यनजर कैटी सरकारसे यातायात व्यवसायीहे करमे छुट डेहे पर्ना बटाइल रहिट ।
कार्यक्रममे राष्ट्रिय मानव अधिकार आयोग सुदूरपश्चिम प्रदेशके कार्यालय प्रमुख प्रकाश दत्त भट्ट यातायात व्यवसायीहुक्रनहे सिट क्षमता अनुसार यात्रु राखे पर्ना ओ सडक दुर्घटना न्यूनीकरणके लाग टिकेटिङ्गके व्यवस्था करे पर्ना सुझाइल रहिट ।
ओस्टके उहाँ यातायात व्यवसायीनके समस्या सम्बोधनके लाग सरकारसे सक्कु यातायात व्यवसायीहुक्रनसे समन्वय सहकार्य कैटी ऐन कानुन निर्माण ओ प्रभावकारी रुपमे कार्यान्वयन फेन करे पर्ना बटाइल रहिट ।
