कैलारी–५ पूर्ण खोप सुनिश्चित वडा घोषणा

पहुरा समाचारदाता
हसुलिया, १७ बैशाख । कैलाली जिल्लाके कैलारी गाउँपालिका वडा नम्बर ५ पूर्ण खोप सुनिश्चित वडा घोषणा हुइल बा ।

यी आर्थिक बर्षमे खोप लगाई पर्ना सक्कु बालबालिका पूर्ण रुपमे खोप लगाइलपाछे मंगरके रोज एक कार्यक्रमके विच वडाहे पूर्ण खोप सुनिश्चित वडा घोषणा कैगिल हो ।

कैलारी गाउँपालिका वडा नम्बर ५ के कार्यालयके आयोजनामे हुइल कार्यक्रममे वडा अध्यक्ष विष्णु प्रसाद चौधरी खोप निशुल्क बा, खोप सुरक्षित बा, खोप लगैलेसे जीवनहे रक्षा करे सेक्ना बटैलै । उहाँ कहलै, ‘खोप लगैलेसे टमान रोगसे बाँचे सेक्जाइठ । खोपके कारण ढेर रोगसे बँचैलेफे बा । आपन लर्कनहे पूर्ण खोपमे सहभागी करैना डाई बाबा ध्यान डेना नितान्त जरुरी रहठ ।’

स्थानीय स्रोतको उपयोग स्वामित्व र सहभागिता, पूर्ण खोप सुनिश्चितता हाम्रो प्रतिवद्धता कना मुल नाराके साथ हुइल पूर्ण खोप सुनिश्चिता वडा घोषणा कार्यक्रममे पवेरा स्वास्थ्य चौकीके प्रमुख खगेन्द्र महरा वडामे रहल बालबालिका खोपके अवस्थाबारे प्रस्तुतीकरण करल रहिट । कार्यक्रममे वडा स्तरीय खोप समन्वय समितिके सदस्य, स्वास्थ्यकर्मी, महिला स्वास्थ्य स्वयं सेविका हुकनकके सहभागिता रहल रहे ।