पाँचौं भजहर कपके उपाधि गौरीगंगा ११ स्पोर्टस क्लवहे
पहुरा समाचारदाता
धनगढी, २५ वैशाख । कैलालीके कैलारी गाउँपालिका वडा नम्बर–८ लोहरपुरमे हुइल निसर्ग हस्पिटल पाँचौं भजहर कप फुटबल प्रतियोगिताके उपाधि गौरीगंगा–११ स्पोर्टस क्लब जिटले बा ।
लोहरपुर खेल मैदानमे हुइल फाईनल खेलमे आयोजक श्री जनहित क्लब बी लाई हरैटी गौरीगंगा च्याम्पीयन हुइल हो । थारुहुकनके पर्व भजहरके अवसरमे हरेक वर्ष हुइटी आइल भजहर कपके पाचौं संस्करणके फाईनलमे गौरीगंगासे आयोजक बी हे २–० से हराइल हो । विजेता हुइलसंगे गौरीगंगा नगद एक लाखसहित ट्रफी पाइल बा । उपविजेता बनल आयोजक श्री जनहित क्लब बी से ५० हजार नगद सहित ट्रफीमे चित्त बुझैले बा ।
प्रतियोगिताके विजयी खेलाडीहुकनहे एक समारोहके बीच पुरस्कार वितरण करल बा । सुदुरपश्चिम चिकित्सक संघके निवर्तमान अध्यक्ष तथा बरिष्ठ बालरोग विशेषज्ञ डाक्टर प्रदीप मिश्र लगायत विजयी खेलाडीहुकनहे पुरस्कार करल रहिट । प्रतियोगितामे टमान विधाके उत्कृष्ट खेलाडीहेफे पुरस्कार वितरण करल आयोजक श्री जनहित युवा क्लबके अध्यक्ष मणिराम चौधरी जानकारी डेलै । थारु समुदायके पर्व भजहरहे नयाँ पुस्तामे संरक्षण करटी आघे बह्राइक लाग करटी आइल प्रतियोगितामे फुटबल प्रतियोगिताके साथे पौराणिक खेलकेफे आयोजना करल रहे। ओकर साथे थारु कला संस्कृतिफे प्रस्तुत करल रहे ।
