चैतन्य टिसरा सुदूरपश्चिम प्रदेशस्तरीय तेक्वान्दो प्रतियोगिता सुरु ११ टोलीके सहभागिता
पहुरा समाचारदाता
धनगढी, १५ जेठ । चैतन्य पाठशालाके आयोजनामे ‘चैतन्य टिसरा सुदूरपश्चिम प्रदेशस्तरीय तेक्वान्दो प्रतियोगिता २०८२ विफेक रोजसे धनगढी–५, शिवनगरस्थित चैतन्य पाठशाला फुटसल मैदानमे सुरु हुइल बा ।
प्रतियोगिताके उदघाटन ओलम्पियन दीपक विष्ट करल रहिट कलेसे कार्यक्रमके अध्यक्षता गणेश प्रसाद जोशी करले रहिट । प्रतियोगितामे सुदूरपश्चिमके ९ जिल्ला ओ २ आयोजक टिमसहित कुल ११ टिमके करिब २०० खेलाडीके सहभागिता रहल बा । सहभागी जिल्लामे अछाम, बझाङ, कैलाली, बाजुरा, डडेल्धुरा, कञ्चनपुर, दार्चुला, डोटी ओ बैतडी रहल बटै ।
तीन दिनसम सञ्चालन हुइना प्रतियोगिता आर्यन विकके नयाँ आर्सी प्लेन उडानसे सुरु करल हो । प्रतियोगिता सेन्सर प्रणालीमार्फत सञ्चालन करटी बा । जिहीसे खेलके पारदर्शिता ओ निष्पक्षता सुनिश्चित कैना बा ।
विजेता टिमहे नगद पुरस्कार प्रदान कैना बा । पहिल टिमहे रु ५० हजार, दुसराहे रु ३० हजार ओ टिसराहे रु २० हजार साथे, पुरुष ओ महिलाओर उत्कृष्ट खेलाडी (वेस्ट फाइटर) हे जनही रु ५ हजार पुरस्कार डेना बा ।
कार्यक्रममे टमान जिल्लासे आइल खेलाडी, अभिभावक, पत्रकार ओ तेक्वान्दोप्रेमीहुकनके उपस्थिति रहल रहे । आयोजक प्रतियोगिता प्रदेशस्तरीय खेल प्रतिभा पहिचान तथा विकासमे सहयोग पुग्न विश्वास व्यक्त करले बटै ।
