थारु समुदायके पहिचान बोकल प्रगति रजावर मरुवाके उदघाटन
पहुरा समाचारदाता
धनगढी, १२ कुवाँर । कैलालीके कैलारी गाउँपालिका वडा नम्बर ४ स्थित के गाउँमे प्रगति रजावर मरुवाके उदघाटन हुइल बा ।
थारु समुदायके कला, संस्कृति, भेषभुसा, परम्परा संरक्षणके लाग स्थापना कैगिल प्रगति रजावर मरुवाके शनिच्चरके रोज विधिवत कार्यक्रमके आयोजना करके समुदाघाटन कैगिल हो ।
प्रगति रजावर मरुवा व्यवस्थापन समितिके अध्यक्ष ठागुराम चौधरीके अध्यक्षतामे हुइल कार्यक्रममे नवनिर्मित मरुवाके उदघाटन कैलारी गाउँपालिका अध्यक्ष राजसमझ चौधरी करल रहिट । कार्यक्रममे सम्बोधन करटी उहाँ जनताके मतसे जनप्रनिधिके रुपमे आइलपाछे जनताके हितमे कामके सुरुवाट करल बटैलै ।
उहाँ कहलै, ‘कार्यपालिकाके पहिल निर्णयसे किसानमे लाग काम आघे बह्राइल रहे । जेम्ने मालपोत कर आधा मिनाह कैगिल बा । कैलारी गाउँपालिका थारु समुदायके गझिन बस्ती हो । थारु समुदायके केल्ह लग्न सिकलसेल रोगहे मध्यनजर करके कैलारीबासीहुकनहे निशुल्क रगतके व्यवस्था मिलाइल बा । शिक्षाके अवस्था नाजुक रहल ओरसे आवश्यकताके आधारमे विद्यालय मर्ज, अधुरा भवन मर्मत तथा निर्माण कार्यहे बहै्रटी ठप कक्षा संचालनके गाउँपालिकासे सहयोग करल हो ।
सिमित आर्थिक स्रोतके बाबजुट बाटोघाटो निर्माणके कार्य आघे बह्राइल कहटी योजनाके काम आघे बह्र्रैटी रहल बेला संघ ओ प्रदेशसे तोकलपाछे कटौटी हुके आइलपाछे योजना प्रभावित हुइल उहाँ बटैलै ।
स्वास्थ्य, कृषि क्षेत्रहे मध्य नजर करटी आवश्यकताके आधारमे कृषि मोटर ओ पावर टिलरके वितरण करल, महिला स्वास्थ्य स्वय सेविकाहुक्रे सेवासे अवकाश प्राप्त करलपाछे एक लाख सहित विदाई कैना निर्णय करके कार्यान्वयन करल ओ एकल पुरुषहेफे गाउँपालिकासे भत्ताके व्यवस्थ मिलाइल अध्यक्ष बटैलै ।
गैल भदौ २३÷२४ गते हुइल जेनजी आन्दोलनके क्रममे ज्यान गुमाइल बाबुभैयाप्रति दुख व्यक्त करलै । उहाँ कहलै, कैलारी गाउँपालिकासे सबसे पहिले ओ दुई दिन जेनजी पुस्ताहे सम्मान ओ समर्थन करटी शोक विदा डेहल रहे । मने छिमेकी पालिका सक्कु बच्ना, कैलारी गाउँपालिका ओ यी पालिकाके वडा कार्यालयके सक्कु सार्वजनिक सम्पतिहे घुसपैठ करके तोडफोड ओ आगीजानी काहे हुइना जनता सोचेपर्ना अवस्था हो । सार्वजनिक सम्पति जराइल कारण अब्बे सर्वसाधारण दुःख पैटी बटै ।’
दुर दुर रहल वडा कार्यालयमे वृद्धा भत्ता, सामाजिक सुरुक्षा भत्ता वितरणके सुरुवाट करल रही । अब्बे वडा कार्यालय ध्वस्त बनाइलपाछे जनताहे दुःख भोगे परल उहाँ बटैलै ।
कार्यक्रममे कार्यपालिका सदस्य लालबहादुर विक भेषभुसा, कला, संस्कृति संरक्षणके लाग निर्माण हुइल रजावर मरुवा साझा सम्पति रहल बटैलै ।
वडा सदस्य लक्ष्मी चौधरी थारु समुदायके पहिचान जोगेना हिसाबसे यी रजावर मरुवाके निर्माण हुइल बटैली । उहाँ आज हमार पुरान गितबाँस कैना ठाउँ पैले बटी ।
पूर्व भल्मन्सा शिवचरण चौधरी, वुद्धिजिवी देवनारायण चौधरी, भल्मन्सा हरिनारायण चौधरीलगायत मन्तव्य व्यक्त करटी रजावर मरुवा निर्माण हुइलपाछे पुरान गीतवाँस डेखैना ठाउँ बनल ओरसे पुरान कला, संस्कृति लौवा पुस्तामे हस्तान्तरण कैना ठाउँ मिलल बटैलै ।
प्रगति रजावर मरुवा व्यवस्थापन समितिके अध्यक्ष ठागुराम चौधरी २०७३ सालमे जिल्ला प्रशासन ओ समाज कल्याण परिषदमे दर्ता हुइलपाछे यकर भवन निर्माणके लाग ढेर प्रयास करल मने पालिकाके सहयोगमे भर्खर निर्माण पुरा हुइल बटैलै । भवन निर्माणके लाग ३० लाख बजेट विनियोजन हुके निर्माण कार्य सम्पन्न हुइल उहाँ जनैलै ।
प्रगति रजावर मरुवा समुदघाटन कार्यक्रमके अवसरमे पूर्व भल्मन्सा, पूर्व केशौका, गुरवाहुकनहे सम्मानफे करल बा ।
सम्मानित हुइलमे पूर्व भल्मन्सा शिवचरण चौधरी, यमलाल चौधरी, फलिराम चौधरी, फकालु चौधरी, कुलबहादुर चौधरी, पूर्व देशबन्धिया गुरुवा खुशीराम चौधरी, रंगबहादुर चौधरी रहल बटै । ओस्टेक प्रगति टोलके पूर्व अध्यक्ष रामनारायण चौधरीहेफे सम्मान करल बा ।
कार्यक्रमके संचालन प्रगति रजावर मरुवाके व्यवस्थापन समितिके सचिव सविता चौधरी करल रहिट । यिहे विच प्रगति टोलसे झुम्रा, सखिया, दिन नचुवा, सोङगीया नाँच डेखागिल रहे ।
