कैलारीके नौ वडामे निशुल्क आँखी उपचार शिविर सचालन हुइना
पहुरा समाचारदाता
धनगढी, ९ पुस । कैलाली जिल्लाके कैलाली गाउँपालिका अन्र्तगत ९ वडामे निशुल्क आँखी उपचार शिविर संचालन कैना जनागिल बा ।
च्यारिटी हेल्थ फाउण्डेशन ओ धनगढी नेत्रालय प्रा.लि. के प्राविधिक सहयोग ओ कैलारी गाउँपालिकाके आयोजना तथा सहकार्य ओ व्यवस्थापनमे कैलारी गाउँपालिकाके सक्कु वडामे यिहे पुस ११ गतेसे पालिक–पाला आँखी सम्बन्धी रोगके निःशुल्क स्वास्थ्य शिबिर सञ्चालन हुइना जनागिल हो ।
शिबिरमे आँखी सम्बन्धी रोगके चेकजाँच, उपचार ओ औषधि उपलब्ध करैना, परिक्षणके कममे छनौट हुइल मोतिबिन्दु, आँखीक पल्का विल्गटल समस्याके अप्रेशन तथा आँखीम मासु पलाइल रोगीके धनगढी नेत्रालयसम एकतर्फी यातायात सुविधा सहित निःशुल्क अप्रेशन सेवा साथे आवश्यकता अनुसार लग्गे लेखपढ कैना चस्माफे उपलब्ध करैना जनागिल बा ।
निशुल्क आँखी शिविर हसुलिया स्वास्थ्य चौकी, वार्ड नं ३ मे पुस ११ गते, के–गाउँ आधारभूत स्वास्थ्य केन्द्र, वडा नं ४ मे पुस १३ गते, पवेरा स्वास्थ्य चौकी, बडा नं ५ मे पुस १४ गते, कैलारी गाउँपालिकाके सभाहल वडा नं १, हसुलियामे १५ गते संचालन हुइना बा ।
ओस्टेक करके बसौटी स्वास्थ्य चौकी, बडा नं २ मे १६ गते, रतनपुर स्वास्थ्य चौकी, वडा नं ७ मे १७ गते, बनकट्टा आधारभुत स्वास्थ्य केन्द्र, वार्ड नं ६ मे १८ गते, गदरिया स्वास्थ्य चौकी, वार्ड नं ९ मे २० गते ओ उदासिपुर प्राथमिक स्वास्थ्य केन्द्र, वडा नं ८ मे २१ गते निशुल्क आँखी जाँच शिविर संचालन हुइना बा ।
आँखी जाँच शिबिरमे नाम दर्ता वापत रु २५ शुल्क लग्ना बा । उ नाम दर्ता बापत उठल रकम च्यारिटी हेल्थ फाउण्डेसनसे सञ्चालित निःशुल्क सव वाहन सल्बालनार्थ कोषमे सहयोग स्वरुप प्रदान कैना जनागिल बा ।
