कैलारीमे हुइल नैसर्ना रोग स्वास्थ्य शिविरमे ३८७ जानेक स्वास्थ्य परीक्षण
पहुरा समाचारदाता
धनगढी, १३ माघ । कैलाली जिल्लाके कैलारी गाउँपालिकामे हुइल दुई दिने नैसर्ना रोग सम्बन्धी स्वास्थ्य शिविरमे ३८७ जाने लाभान्वित हुइल बटै ।
कैलारी गाउँपालिका–५ हसुलिया ओ ९ गदरिया क्षेत्रमे सञ्चालन करल उ शिविर सोम्मार सम्पन्न हुइल रहे । शिविर जिल्ला स्वास्थ्य कार्यालय कैलालीके आयोजना तथा कैलारी गाउँपालिका स्वास्थ्य शाखाके समन्वयमे सञ्चालन करल रहे । शिविरमे ३० वर्ष उप्परके व्यक्तिनहे लक्षित करके नैसर्ना रोगसम्बन्धी स्वास्थ्य परीक्षण, सचेतना तथा परामर्श सेवा प्रदान करल रहे । शिविरमे डा. टेकराज उपाध्यायके उपस्थितिमे मधुमेह, उच्च रक्तचाप, मुटु रोग, मिर्गौला रोग लगायत नैसर्ना रोगके प्रारम्भिक परीक्षण तथा परामर्श करल आयोजक जनैले बा ।
स्वास्थ्य कार्यालय कैलालीक प्रवक्ता तथा सूचना अधिकारी मिनबहादुर धामीके अनुसार अँटवार १७२ जाने ओ सोम्मार २१५ जाने करके दुई दिनमे ३८७ जानेक स्वास्थ्य परीक्षण करल बा ।
‘नैसर्ना रोग निदानके लाग स्वास्थ्य परीक्षण’ कना मूल सन्देशके साथ सञ्चालन करल यी कार्यक्रमसे दैनिक जीविकोपार्जनमे व्यस्त रना समुदायहे लक्षित करल बा । पछिल्का समय नैसर्ना रोग प्रमुख स्वास्थ्य समस्याके रूपमे देखा परटी रहल बा ।
प्रवक्ता धामी बदल्टी जीवनशैली, खानपान ओ रहनसहनके कारण उच्च रक्तचाप, मधुमेह, मुटुरोग लगायतके नैसर्ना रोग तीव्र रूपमे बह्रटी गैल बटैलै । उहाँ अनुसार यैसिन रोग अब्बे सरुवा रोगसेफे गम्भीर चुनौतीके रूपमे हुइटी गैल बा ।
स्वास्थ्य शिविरमे उच्च रक्तचाप, मधुमेह परीक्षणके साथे तौल, उचाइ मापन तथा आवश्यक परलमे औषधि वितरणसमेत करल कैलारी गाउँपालिका स्वास्थ्य शाखाके प्रमुख नरेशकुमार चौधरी जनैलै ।
ओइने नैसर्ना रोगके कारण दैनिक कामकाजमे असर पर्ना करल उल्लेख करटी यैसिन शिविरसे समयमे रोग पत्ता लगैना मद्दत पुग्न बटैलै । सुदूरपश्चिम प्रदेश सरकारके प्राथमिकतामे रहल स्वास्थ्य सेवा आमनागरिकसम पुगैना उद्देश्यसे यैसिन कार्यक्रमहे निरन्तरता डेना स्वास्थ्य कार्यालय जनैले बा ।
