कैलारीके २६ बालबालिकामे कडा खाले कुपोषण

पहुरा समाचारदाता
धनगढी, १५ माघ । कैलाली जिल्लाके कैलारी गाउँपालिकामे २६ जाने बालबालिकाहुकनमे कडा खालके सिघ्र कुपोषण डेखा परल बा ।
कैलारी गाउँपालिका स्वास्थ्य शाखाके आयोजनामे केयर नेपाल ओ आइडिई के आर्थिक सहयोग तथा याक नेपालके समन्वय सहकार्यमे कैगिल वृहत पोषण लेखाजोखा (स्क्रनिङ) अभियानमे ओटरा कडा खालके सिघ्र कुपोषण डेखा परल हो ।

गाउँपालिका अन्र्तगत सक्कु वडामे रहल नौ ठो स्वास्थ्य संस्थामे ६ महिनासे ५ बरस टरेक बालबालिकाके पोषण लेखाजोखा (स्क्रेनिङ) कैगिल कैलारी गाउँपालिका स्वास्थ्य शाखाके प्रमुख नरेशकुमार चौधरी जनैलै ।

नौ ठो स्वास्थ्य संस्थामे ६ महिनासे पाँच बरस भिटरके कुल २ हजार १ सय ७३ जाने बालबालिकाके पोषण लेखाजोखा (स्क्रेनिङ) कैगिलमे १ हजार ९ सय ५६ जाने सामान्य, १ सय ९१ माध्यम सिघ्र कुपोषण ओ २६ जनहनमे कडा खालके सिघ्र कुपोषण डेखा परल उहाँ बटैलै ।

वडा नम्बर १ स्थित मनाउ आधारभूत स्वास्थ्य केन्द्रमे २३४ जानेक पोषण लेखाजोखा करलमे २०५ मे सामान्य, २४ जनहनमे माध्यम सिघ्र कुपोषण ओ ५ जनहनमे कडा सिघ्र कुपोषण डेखा परल बा ।

वडा नम्बर २ स्थित बसौटी स्वास्थ्य चौकीमे २२८ जानेक पोषण लेखाजोखा करलमे २०० जनहनमे सामान्य, २३ जनहनमे माध्यम सिघ्र ओ ५ जनहनमे कडा सिघ्र कुपोषण डेखा परल बा ।

वडा नम्बर ३ स्थित हसुलिया स्वास्थ्य चौकीमे १७५ बालबालिकाके पोषण लेखाजोखा करलमे १५५ जानेक सामान्य, २० जाने माध्यम खालके कुपोषण ओ कडा खालके कुपोषण यहाँ डेखा नैपरल रहे ।

वडा नम्बर ४ स्थित के गाउँ आधारभूत स्वास्थ्य केन्द्रमे २४३ जानेक पोषण लेखा जोखा करलमे २२५ जाने सामान्य, १७ जाने माध्यम ओ एक जानेकमे कडा खालके कुपोषण डेखा परल बा ।

वडा नम्बर ५ स्थित पवेरा स्वास्थ्य चौकीमे २४४ जानेक पोषण लेखा जोखा करलमे २०३ जाने सामान्य, ३७ जाने माध्यम खालके कुपोषण, ओ ४ जनहनमे कडा खालके कुपोषण डेखा परल बा ।

वडा नम्बर ६ स्थित बनकट्टा आधारभूत स्वास्थ्य केन्द्रमे २०४ जानेक पोषण लेखाजोखा करलमे १९२ जाने सामान्य, ११ जाने माध्यम खाले कुपोषण ओ २ जनहनमे कडा खाले कुपोषण डेखा परल बा ।

वडा नम्बर ७ स्थित रतनपुर स्वास्थ्य चौकीमे ३२३ जानेक पोषण लेखाजोखा करलमे २९८ जाने सामान्य, २३ जनहनमे माध्यम खाले कुपोषण ओ २ जनहनमे कडा खालके कुपोषण डेखा परल बा ।

वडा नम्बर ८ स्थित उदासीपुर प्राथमिक स्वास्थ्य केन्द्र पृथ्वीपुरमे २८८ जानेक पोषण लेखा करलमे २६६ जाने सामान्य, १८ जाने माध्यम खाले कुपोषण ओ ४ जनहनमे कडा खाले कुपोषण डेखा परल बा ।

ओस्टेक करके वडा नम्बर ९ स्थित गदरिया स्वास्थ्य चौकीमे २३४ जानेक पोषण लेखाजोखा करलमे २१३ जनहनमे माध्यम ओ १८ जनहनमे माध्मम खालके ओ ३ जनहनमे कडा खालके कुपोषण डेखा परल बा ।

याक नेपालके लैङिक समानता सामाजिक समावेशीकरण अधिकृत सरिता चौधरी पोषण परियोजना मार्फत कैलारी गाउँपालिका वडा नम्बर ४ ओ ७ के २५ ठो आमा समुह पोषण सुधारके लाग पोषण बगैचा सुरुवाट करल बटैली ।

हजार दिनके लरकोरया डाई ओ बच्चाके पोषण सुधारके लाग पोषणके गतिविधि करजैटी बा, उहाँ कहली, ‘सीमान्तकृत समुदायके लाग विउ पुँजीके रुपमे १० हजार रुप्या सहितके किसान कार्ड उपलब्ध करागैल बा । जिहीहे उ समुहमे रहल लरकोरया डाई सागपात, हरियार टिना टावन उत्पादनके लाग विया किन्ना, पोषण बगैचा निर्माण कैना ओ टिना उत्पादन अन्र्तगत कृषि कार्यमे प्रयोग हुइना समान किन्ठै ।

याक नेपालसे आमा समु्हमे आवद्ध रहल ५ सय जनहनहे किसान कार्ड उपलब्ध करैले बा, जौन कार्डमे टिनाके विया, हजारी, पानी डरना पाइप, जाली, उत्पादन पोषण बगैचाके लाग सपोट करल उहाँ बटैली ।

पोषण बगैचामे टमान मेरिक हरियार साग, मौसमी तथा वेमौसमी टिना उत्पादन कैगिल बा । कलेसे महिलाहुकनके बच्चनके लाग झोल लिटो पकैना तरिकाफे सिखागैल बा । पोषण परियोजना लागु हुइलपाछे पोषणयूक्त खानाके साथे स्वास्थ्य संस्थामे समय समयमे चेकजाँच करैटी रहलपाछे माध्यम कुपोषणके केसहे सामान्य अवस्थामे ल्यन्ना मद्दत मिलल उहाँ बटैली ।

कैलारी गाउँपालिकाके महिला बालबालिका तथा जेष्ठ नागरिक शाखाके प्रमुख बालकुमारी चौधरी बाल विवाहके कारण ओइनमन्से जलमना बच्चाके कम्जोर ओ कुपोषणके शिकार बन्ना मुख्य कारण रहल बटैली । उहाँ कहली, छोटेम मसे भागके भोज कैना, शरिर परिपक्का हुइलविन लर्का जलमा लेटी रलक कारण छाई ओ लर्काके स्वास्थ्य कम्जोर हुइना ओ पाछे लर्काफे कुपोषिट हुइल डेखा पर्ना करल बा ।