नवजीवन अस्पतालके २०औं बार्षिकोत्सव
पहुरा समाचारदाता
धनगढी, १७ फागुन । सुदूरपश्चिम प्रदेशके अस्थायी राजधानी धनगढीमे निजी स्तरके लगानीसे सञ्चालित नवजीवन अस्पताल स्थापनाके २०औं वर्ष पूरा करले बा ।
धनगढी उपमहानगरपालिका वडा नम्बर ४ उत्तर बेहडीमे २०६२ साल फागुन १७ गते स्थापना हुइल निजी क्षेत्रके प्रदेशके पहिल अस्पताल नवजीवनसे विशेषज्ञ स्वास्थ्य सेवा प्रदान करटी रहल बा ।
२०६२ सालमे १५ शय्यासे सुरु हुइल नवजीवनसे २०६८ सालसे ५० शय्या सञ्चालनके अनुमति पाइल रहे । स्वास्थ्य सेवा विभागसे ५० शय्या सञ्चालनके अनुमति पाइल नवजीवनसे २०७९ कुँवारसे एकसय शय्यासे उपचार सेवा प्रदान करटी रहल बा ।
अस्पतालमे टमान मेरके सेवा सञ्चालन, उपचार सेवाके अतिरिक्त शैक्षिक कार्यक्रम समेत सञ्चालन कैटी आइल अस्पतालमे २४ सैं घण्टा उपचार सेवा डेटी रहल अस्पतालके निर्देशक डाक्टर विदुरमणि ढकाल बटैलै । उहाँ हाल एकसय शय्या क्षमतामे उपचार प्रदान करटी रहलमे अस्पतालमे थप सेवा सुविधा थप्टी जैना समेत बटैलै ।
निजी लगानीसे सञ्चालित नवजीवन अस्पतालसे सामाजिक उत्तरदायित्व बहन कैटी नेपाल सरकारसँगके सहकार्यमे टमान स्थानमे निःशुल्क स्वास्थ्य शिविर सञ्चालन कैटी आइल बा । अस्पतालसे आमा सुरक्षा कार्यक्रम, खोप कार्यक्रम क्षयरोगके बिरामीके निःशुल्क औषधि वितरण लगायतके उपचार सेवा प्रदान कैटी आइल जनैले बा ।अस्पतालसे प्रदान करटी आइल डाइलासिस सेवाहे १० बेडके बनैना जनैलै ।
ओस्टेक करके उहाँ नवजीवन अस्पतालके अपने लौव सुविधा सम्पन्न भवनमे सेवा सुचारु कैना जनागिल बा ।
अस्पतालसे एक बरसके अवधिमे करिब ५० हजार ८०८ जाने बिरामी उपचार सेवा पैले बटै । अस्पतालसे आव २०८१ फागुन से २०८२ माघ मसान्तसम्म एक बरसमे अस्पतालसे उ संख्यामे बिरामी उपचार सेवा पाइल हुइट ।
अस्पताल भिट्टर तथा टमान स्थानमे सञ्चालित स्वाथ्य शिविर मार्फत ६ हजार ३४८ जनहनहे निःशुल्क सेवा डेहल मेडिकल डाइरेक्टर डा। ढकाल जानकारी डेलै ।
ओस्टके अस्तालसे दुईहजार ७५ जनहनहे निःशुल्क सुत्केरी सेवा ओ तीन हजार २३९ जाने बालबालिकाहे निःशुल्क खोप फेन डेहल जनैले बा । साथे अस्पतालसे इमरजेन्सीसे चार हजार ३३६ जाने, बहिरंगसे ३५ हजार ८ ओ अन्तरंगसे ६ हजार १५० जाने विरामीहे सेवा डेहल जनैले बा ।
उहे अवसरमे अस्पतालसे आपन वार्षिकोत्सवके अवसरमे रक्तदान ओ विरामीहे फलफुल वितरण फेन करल जनाइल बा ।
अस्पतालमे डिप्लोमा तहके नर्सिङ, सामान्य चिकित्सा ओ फार्मेसीके अध्यापन हुइना करल बा । अस्पतालमे हरेक दिन हाडजोर्नी विशेषज्ञ सेवा, प्रसूति तथा महिला रोग विशेषज्ञ सेवा, विशेषज्ञ बालरोग सेवा, जनरल तथा ल्याप्रेस्कोपिक सर्जन विशेषज्ञ सेवा सञ्चालनमे रहल बा ।
ओस्टके, विशेषज्ञ मानसिक तथा स्नायु रोग सेवा, पेट, छाती तथा मुटुरोग विशेषज्ञ सेवा, एनेस्थेशियोलोजिष्ट एवं क्रिटिकल केयर सेवा, विशेषज्ञ मुटुरोग सेवा प्रदान हुइटी रहल जनाइल बा ।
वार्षिकोत्सवके अवसरमे आयोजित पत्रकार सम्मेलन कार्यक्रममे प्रवन्धक चक्र कठायत, डाक्टर ओ संचालक योगेन्द्र ओझालगायतके सहभागिता रहे । कार्यक्रम संचालन सुचना अधिकारी राजेश पाण्डेय करल रहिट । वार्षिकोत्सवके अवसरमे रक्तदान कार्यक्रम ओ विराामीहुकनहे फलफुलफे वितरण कैगिल बा ।
