धनगढी उपमहानगरपालिकासे पाठेघरके मुखके क्यान्सर परीक्षण शिविर सञ्चालन कैटी
पहुरा समाचारदाता
धनगढी, १३ चैत । धनगढी उप–महानगरपालिकासे नियमित चौठा वर्षफे महिलाके प्रजनन स्वास्थ्य सुदृढीकरण कैना उद्देश्यले “प्रजनन स्वास्थ्य एकीकृत रोग नियन्त्रण कार्यक्रम” अन्तर्गत एचपीभि डिएनए विधिसे पाठेघरके मुखके क्यान्सर (सर्भाइकल क्यान्सर) परीक्षण सम्बन्धी निःशुल्क शिविर सञ्चालन करेक लाग बा ।
नगर कार्यपालिकाके कार्यालयसे सार्वजनिक करल सूचनाअनुसार उ शिविर २०८२ साल चैत्र १५ गतेसे टमान वडामे चरणबद्ध रूपमे सञ्चालन कैना बा । कार्यक्रम बिहान १०ः०० बजेसे दुपहर ३ बजेसम सञ्चालन हुइना जनाइल बा ।
कार्यतालिकाअनुसार चैत्र १५ गते वडा नं. ७ स्थित शहरी स्वास्थ्य प्रवद्र्धन केन्द्र, बेलीे शिविर सुरु हुइना बा कलेसे चैत्र १६ गते वडा नं. १९ के फुलबारी स्वास्थ्य चौकीेमे सञ्चालन कैना बा । ओस्टेक करके चैत्र १७ गते वडा नं. ८ के आधारभूत स्वास्थ्य सेवा केन्द्रमे सेवा प्रदान कैना बा । चैत्र २० गते वडा नं. ३ ओ चैत्र २२ गते वडा नं. ४ के आधारभूत स्वास्थ्य सेवा केन्द्रमे शिविर सञ्चालन हुइना बा ।
ओस्टे चैत्र २३ गते वडा नं. १३ स्थित शहरी स्वास्थ्य केन्द्र, कैलाली गाउँमे कार्यक्रम हुइना जनाइल बा कलेसे चैत्र २५ गते वडा नं. ५ के आधारभूत स्वास्थ्य सेवा केन्द्रमे सेवा प्रदान कैना बा । अन्तिम चरणमे चैत्र २६ गते वडा नं. ६ स्थित शहरी स्वास्थ्य केन्द्र, मटियारीमे शिविर सञ्चालन हुइना बा ।
यी कार्यक्रम अन्तर्गत ३० वर्षसे उप्परके तथा महिनावारी बन्द नैहुइल महिलाहुक्रे, एचपीभि डिएनए परीक्षण कराइल ५ वर्ष पूरा हुइल महिलाहुक्रे ओ यी आघे परीक्षण करेबेर पोजिटिभ नतिजा आइल महिलाहुकनहे लक्षित करल बा ।
धनगढीके नगर प्रमुख गोपाल हमालसे महिलाके स्वास्थ्य सुरक्षाहे प्राथमिकतामे रख्टी यैसिन कार्यक्रम सञ्चालन करल बटैले बटै । उहाँ सक्कु योग्य महिलाहे निःशुल्क परीक्षण सेवा लेना आग्रह करटी समयमे परीक्षण कराइल पाठेघरके मुखके क्यान्सरसे जोगे सेक्ना उल्लेख करले बटै ।
पाठेघरके मुखके क्यान्सर महिलामे डेख्ना प्रमुख क्यान्सरमध्ये एक हुइल ओरसे समयमे परीक्षण ओ पहिचान अत्यन्त आवश्यक मानजाइठ । एचपीभि डिएनए विधि आधुनिक तथा प्रभावकारी परीक्षण प्रणाली हुइल ओरसे रोगके प्रारम्भिक अवस्थामे पहिचान कैना सहयोग पुग्न विश्वास करल बा ।
धनगढी उप–महानगरपालिकासे सम्बन्धित वडामे बसोबास कैना सक्कु योग्य महिलाहुकनहे अपनहे पायक पर्ना स्थानमे सञ्चालन हुइना शिविरमे उपस्थित हुके सेवा लेना आग्रह करले बा । यी कार्यक्रम विगत तीन वर्षसे संचालनमे रहल बा ।
