धनगढी उपमहानगरपालिकासे बरघर/भल्मन्सा ऐन बनाइक लाग चासो

पहुरा समाचारदाता
धनगढी, २१ चैत । कैलाली जिल्लाके धनगढी उपमहानगरपालिकासे थारु समुदायके प्रथाजनित बरघर भल्मन्सा ऐन बनाइक लाग सकारात्मक डेखल बा ।

बरघर तथा भलमन्साहुकनके काम, कर्तब्य ओ अधिकार सम्बन्धी कानुन निर्माण कैना उद्देश्यके साथ धनगढी उपमहानगरपाकिासे बरघर÷भल्मन्सा बनासेकल टमान पालिकाके असल अभ्यासके अध्ययन कैगिल बा ।

धनगढी उपमहानगरपाकिाके नगर प्रमुख गोपाल हमाल तथा नगर उपप्रमुख नेतृत्वके टोलीसे कैलालीसे लेके दाङ जिल्लामे पुगके बरघर/भल्मन्सा ऐन जारी करल पालिकामे पुगके अनुभव आदान–प्रदान तथा आवश्यक छलफल कैगिल बा ।

छलफल तथा अनुभव साटासाट कार्यक्रममे कैलाली जिल्लाके कैलारी गाउँपालिकामे गाउँपालिका अध्यक्ष राजसमझ चौधरी, उपाध्यक्ष भगवतीकुमारी चौधरीलगायत गाउँपालिका वडाध्यक्ष, कर्मचारीनसे छलफल कैगिल बा ।

उहे क्रममे धनगढी उपमहानगरपालिकासे बर्दिया जिल्लाके बारबर्दिया नगरपालिका, बाँकेके राप्ती सोनारी गाउँपालिका, दाङ जिल्लाके तुल्सीपुर उपमहानगरपालिकासँग छलफल तथा अनुभव साटासाट धनगढी उपमहानगरपालिकाके नगर उप्रमुख कन्दकला कुमारी राना बटैली । धनगढी उपमहानगरपालिकासे बरघर/भल्मन्सा सम्बन्धी ऐन ल्यानेक लाग लागु हुइल स्थानीय तहके पालिकाके प्रमुख तथा जनप्रतिनिधिहुकनसे छलफल कैगिल उहाँ बटैली ।

छलफल तथा अनुभव साटासाट टोलीमे नगर प्रमुखलगायत नगर उपप्रमुख, १० नं. वडाके वडाध्यक्ष शिवकुमार राना, १९ नं. वडाके वडाध्यक्ष बाँधुराम चौधरी, कार्यर्पालिका सदस्य सुष्मा चौधरी, प्रमुख प्रशासकीय अधिकृत नरेन्द्रबहादुर खाती, कानुनी सल्लाहकार वीरबहादुर जेठारा, थारू कल्याणकारिणी सभा कैलालीके सभापति वीर बहादुर थारू, नेपाल राना थारू समाजके केन्द्रीय अध्यक्ष कमल सिं राना, धनगढी नगर भलमन्सा समितिके अध्यक्ष रोहित चौधरी, लेखा अधिकृत मेम्बर सिंह, सामाजिक विकास अधिकृत टंक बहादुर विष्ट ओ कानून अधिकृत खडक सिंह कुञ्जेडाके उपस्थितिमे भल्मन्सा कानुन सम्बन्धी अभ्यासके बारेमे अन्तक्र्रिया कैगिल बा ।