पोषण लेखाजोख तथा व्यवस्थापन कार्यक्रमके समिक्षा
पहुरा समाचारदाता
धनगढी, ४ बैशाख । पोषण परियोजनाके पोषण लेखाजोखा तथा व्यवस्थापन कार्यक्रमके समिक्षा कैगिल बा ।
कैलारी गाउँपालिका स्वास्थ्य शाखाके आयोजनामे केयर नेपाल ओ आइडिई के आर्थिक सहयोग तथा याक नेपालके समन्वय सहकार्यमे पोषण परियोजनाके पोषण लेखाजोखा तथा व्यवस्थापन कार्यक्रमके समिक्षा कैगिल हो । गाउँपालिका उपाध्यक्ष भगवती कुमारी चौधरीके विशिष्ट आतिथ्यतामे हुइल कार्यक्रममे उहाँ कैलारीमे टमान बालिकामे कडा खालके सिघ्र कुपोषण डेखा परल बटैली । उहाँ कहली हमार गाउँघरमे खैनाचिजके कमी नैहो, मने कौन खैना चिज कैसिक खाई परठ, कब खाई परठ, अपने खैना ओ आपन लर्कनहे लर्कन कैसिक खवैना बाट पत्ता नैहुके खानाहे सन्तुलन मिलाई नैजान्के बच्चा कुपोषित हुइटी रहल बटै ।
बाल विवाहके कारण छोटेम जलमल लर्कनमेफे कुपोषणके समस्या डेखा परठ, गाउँपालिका उपाध्यक्ष कहली, छोटेम भोज कैले बेला अपने कम्जोर रना ओम्नेफे बच्चा जलमैना करल कारण जलमल बच्चा कम्जोर हुके कुपोषित रठै ।
कैलारी गाउँपालिका स्वास्थ्य शाखाके प्रमुख नरेशकुमार चौधरी नौ ठो स्वास्थ्य संस्थामे ६ महिनासे पाँच बरस भिटरके कुल २ हजार १ सय ७३ जाने बालबालिकाके पोषण लेखाजोखा (स्क्रेनिङ) कैगिलमे १ हजार ९ सय ५६ जाने सामान्य, १ सय ९१ माध्यम सिघ्र कुपोषण ओ २६ जनहनमे कडा खालके सिघ्र कुपोषण डेखा परल बटैलै ।
वडा नम्बर १ स्थित मनाउ आधारभूत स्वास्थ्य केन्द्रमे २३४ जानेक पोषण लेखाजोखा करलमे २०५ मे सामान्य, २४ जनहनमे माध्यम सिघ्र कुपोषण ओ ५ जनहनमे कडा सिघ्र कुपोषण डेखा परल बा ।
वडा नम्बर २ स्थित बसौटी स्वास्थ्य चौकीमे २२८ जानेक पोषण लेखाजोखा करलमे २०० जनहनमे सामान्य, २३ जनहनमे माध्यम सिघ्र ओ ५ जनहनमे कडा सिघ्र कुपोषण डेखा परल बा ।
वडा नम्बर ३ स्थित हसुलिया स्वास्थ्य चौकीमे १७५ बालबालिकाके पोषण लेखाजोखा करलमे १५५ जानेक सामान्य, २० जाने माध्यम खालके कुपोषण ओ कडा खालके कुपोषण यहाँ डेखा नैपरल रहे ।
वडा नम्बर ४ स्थित के गाउँ आधारभूत स्वास्थ्य केन्द्रमे २४३ जानेक पोषण लेखा जोखा करलमे २२५ जाने सामान्य, १७ जाने माध्यम ओ एक जानेकमे कडा खालके कुपोषण डेखा परल बा ।
वडा नम्बर ५ स्थित पवेरा स्वास्थ्य चौकीमे २४४ जानेक पोषण लेखा जोखा करलमे २०३ जाने सामान्य, ३७ जाने माध्यम खालके कुपोषण, ओ ४ जनहनमे कडा खालके कुपोषण डेखा परल बा ।
वडा नम्बर ६ स्थित बनकट्टा आधारभूत स्वास्थ्य केन्द्रमे २०४ जानेक पोषण लेखाजोखा करलमे १९२ जाने सामान्य, ११ जाने माध्यम खाले कुपोषण ओ २ जनहनमे कडा खाले कुपोषण डेखा परल बा ।
वडा नम्बर ७ स्थित रतनपुर स्वास्थ्य चौकीमे ३२३ जानेक पोषण लेखाजोखा करलमे २९८ जाने सामान्य, २३ जनहनमे माध्यम खाले कुपोषण ओ २ जनहनमे कडा खालके कुपोषण डेखा परल बा ।
वडा नम्बर ८ स्थित उदासीपुर प्राथमिक स्वास्थ्य केन्द्र पृथ्वीपुरमे २८८ जानेक पोषण लेखा करलमे २६६ जाने सामान्य, १८ जाने माध्यम खाले कुपोषण ओ ४ जनहनमे कडा खाले कुपोषण डेखा परल बा ।
ओस्टेक करके वडा नम्बर ९ स्थित गदरिया स्वास्थ्य चौकीमे २३४ जानेक पोषण लेखाजोखा करलमे २१३ जनहनमे माध्यम ओ १८ जनहनमे माध्मम खालके ओ ३ जनहनमे कडा खालके कुपोषण डेखा परल बा ।
याक नेपालके लैङिक समानता सामाजिक समावेशीकरण अधिकृत सरिता चौधरी पोषण परियोजना मार्फत कैलारी गाउँपालिका वडा नम्बर ४ ओ ७ के २५ ठो आमा समुह पोषण सुधारके लाग पोषण बगैचा सुरुवाट करल बटैली ।
हजार दिनके लरकोरया डाई ओ बच्चाके पोषण सुधारके लाग पोषणके गतिविधि करजैटी बा, उहाँ कहली, ‘सीमान्तकृत समुदायके लाग विउ पुँजीके रुपमे १० हजार रुप्या सहितके किसान कार्ड उपलब्ध करागैल बा । जिहीहे उ समुहमे रहल लरकोरया डाई सागपात, हरियार टिना टावन उत्पादनके लाग विया किन्ना, पोषण बगैचा निर्माण कैना ओ टिना उत्पादन अन्र्तगत कृषि कार्यमे प्रयोग हुइना समान किन्ठै ।
याक नेपालसे आमा समु्हमे आवद्ध रहल ५ सय जनहनहे किसान कार्ड उपलब्ध करैले बा, जौन कार्डमे टिनाके विया, हजारी, पानी डरना पाइप, जाली, उत्पादन पोषण बगैचाके लाग सपोट करल उहाँ बटैली ।
पोषण बगैचामे टमान मेरिक हरियार साग, मौसमी तथा वेमौसमी टिना उत्पादन कैगिल बा । कलेसे महिलाहुकनके बच्चनके लाग झोल लिटो पकैना तरिकाफे सिखागैल बा । पोषण परियोजना लागु हुइलपाछे पोषणयूक्त खानाके साथे स्वास्थ्य संस्थामे समय समयमे चेकजाँच करैटी रहलपाछे माध्यम कुपोषणके केसहे सामान्य अवस्थामे ल्यन्ना मद्दत मिलल उहाँ बटैली ।
