कैलारीमे हुइल रक्तदानमे २८ पिन्ट रगत संकलन

पहुरा समाचारदाता
धनगढी, ६ जेठ । कैलाली जिल्लाके कैलारी गाउँपालिकास्थित हसुलियामे बुधके रोज हुइल रक्तदान कार्यक्रममे २८ पिन्ट रगत संकलन हुइल बा ।

नेपाल रेडक्रस सोसाइटी कैलारी उपशाखाके आयोजनामे हुइल रक्तदान कार्यक्रममे ओटरा रगत संकलन हुइल हो । रक्तदान जीवन हो कहटी रक्तदान करल नेपाल रेडक्रस सोसाइटी कैलारी उपशाखाके कार्यबाहक सभापति राम कृष्ण चौधरी जनैलै । थारु समुदाय सिकलसेल रोगसे ढेर प्रभावित बटै, सिकलसेल एनिमियामे ढेर रगतके आवश्यक परल ओरसे उहीहे मध्ये नजर करके रक्तदानके आयोजना करल उहाँ जनैलै ।

नेपाल रेडक्रस सोसाइटी कैलारी उपशाखासे प्रत्येक बरस रक्तदान करटी आइल उहाँ जनैलै । वृहत रक्तदान कार्यक्रममे टमान व्यक्तित्वहुक्रे रक्तदान करल रहिट ।