रामसमझ स्मृति कप फुटबल सुरु
मुख्यमन्त्री कमलबहादुर शाहसे प्रतियोगिताके उदघाटन
पहुरा समाचारदाता
धनगढी, ७ जेठ । “खेलकुद हमार पहिचान, स्वस्थ जीवन हमार अभियान” कना नाराके साथ कैलारीमे ‘स्व. रामसमझ चौधरी प्रथम स्मृति कप फुटबल प्रतियोगिता–२०८३’ सुरु हुइल बा ।
रामसमझ स्मृति विकास मञ्चके आयोजनामे कैलारी गाउँपालिका–३ भर्रीमे सुरु हुइल प्रतियोगिताके उदघाटन सुदूरपश्चिम प्रदेशके मुख्यमन्त्री कमलबहादुर शाह करल रहिट ।
उदघाटन कार्यक्रममे मुख्यमन्त्री शाहसे स्व. चौधरीसे लोकतन्त्र ओ प्रजातन्त्र स्थापनाके लाग खेलल भूमिकाके स्मरण करैलै । उहाँ मञ्चके विकासके लाग प्रदेश सरकारके ओरसे सेक्ना सहयोग कैना प्रतिबद्धता समेत व्यक्त करलै ।
वि.सं. २०२१ मे जन्मल स्व. रामसमझ चौधरी विद्यार्थी जीवनसे राजनीति ओ समाजसेवामे सक्रिय रहिट । वि.सं. २०३४ से राजनीतिक यात्रा सुरु करल उहाँ नेविसंघ ओ तरुण दलके केन्द्रीय सदस्य तथा नेपाली कांग्रेसके महासमिति सदस्य लगायतके महत्वपूर्ण जिम्मेवारी सम्हारल रहिट ।
जेठ १४ गतेसम चल्न प्रतियोगितामे १६ ठो टिमके सहभागिता रहल बा ।
मञ्चके अध्यक्ष रेनु चौधरीके सभापतित्वमे हुइल उदघाटन कार्यक्रममे राष्ट्रिय सभा सदस्य, नेपाली कांग्रेस कैलालीके सभापति नारायणदत्त भट्ट, उपाध्यक्ष खेम चौधरी, सचिव निर्प सुनार ओ कैलारी गाउँपालिकाका अध्यक्ष राजसमझ चौधरी लगायतके उपस्थिति रहे ।
