चैतन्यसे आमाको माया छात्रावासमे स्टेशनरी तथा खाद्यान्न वितरण
पहुरा समाचारदाता
धनगढी, १८ जेठ । शिक्षा ओ संस्कारहे सँगसँगे आघे बह्रैटी आइल चैतन्य पाठशालासे अपन २६औँ स्थापना दिवस विशेष तथा स्मरणीय रूपमे मनैले बा ।
स्थापना दिवसके अवसरमे विद्यालयसे सामाजिक उत्तरदायित्वहे प्राथमिकतामे रख्टी धनगढीस्थित जनजाति कल्याण आश्रम नेपाल द्वारा सञ्चालित आमाको माया छात्रावासमे आश्रित बालबालिकाके लाग स्टेशनरी सामग्री तथा खाद्यान्न वितरण करल हो ।
समाजप्रति विद्यालयके दायित्व केवल गुणस्तरीय शिक्षा प्रदान कैना केल्ह नैहुके मानवीय संवेदना, सहयोग ओ सामाजिक सेवाके भावना विकास कैनाफे रहल विश्वासके साथ उ कार्यक्रम आयोजना करल विद्यालय जनैले बा ।
स्थापना दिवसके अवसरमे विद्यालयके शिक्षक, कर्मचारी तथा कक्षा १० के विद्यार्थीके उपस्थितिमे छात्रावासमे पुगके आवश्यक शैक्षिक तथा खाद्य सामग्री हस्तान्तरण करल रहे ।
उहे अवसरमे विद्यार्थीहुक्रे समेत आपन खाजा खर्च बापतके रकम जम्मा करके हस्तान्तरण करल रहिट कलेसे अभिभावक ज्ञानु रोकायासे समेत उ कार्यमे सहयोग करल रहिट । यैसिन सहयोगात्मक कार्यक्रमसे बालबालिकाके शैक्षिक यात्रामे सकारात्मक प्रभाव पर्नाके साथे सामाजिक सद्भाव ओ मानवीय सम्बन्धहे आउर बलगर बनैना विश्वास लेहल बा ।
चैतन्य पाठशालासे विगत २६ वर्षसे शिक्षा क्षेत्रमे योगदान पुगैटी आइल स्मरण करटी संस्थाके सफलताके वास्तविक आधार समाज, अभिभावक ओ विद्यार्थीके विश्वास रहल पाठशालाके प्राचार्य प्रेमनिधि ओझा बटैलै । विद्यालयसे शिक्षासंगे सामाजिक उत्तरदायित्वहेफे अपन प्रमुख कर्तव्यके रूपमे लेटी आइल ओ अइना दिनमे समेत यैसिन सेवामूलक कार्यक्रमहे निरन्तरता डेना उहाँ बटैलै ।
चैतन्य पाठशालासे हरेक समय प्राप्त सहयोगसे दैनिक आवश्यकताके पूर्तिमे सहयोग पुग्नके साथै अपनहे समाजसे साथ डेहल अनुभूति डेहुवाइल आमाको माया छात्रावास प्रमुख सुवास तामाङ बटैलै ।
स्थापना दिवसके अवसरमे करल यी सहयोगात्मक कार्यक्रमसे चैतन्य पाठशालाके सामाजिक प्रतिबद्धता, मानवीय संवेदना ओ सेवामूलक सोचहे पुनः एक चो उजागर करले बा । विद्यालयसे अइना दिनमेफे यैसिन रचनात्मक तथा समाजमुखी गतिविधिहे निरन्तरता डेटी शिक्षा ओ संस्कारके यात्राहे आउर प्रभावकारी बनैना विश्वास व्यक्त करले बा ।
