कैलाली अस्पतालमे सामाजिक सुरक्षा कोष स्वास्थ्य सेवा सुरु
पहुरा समाचारदाता
धनगढी, २३ जेठ । धनगढीके कैलाली अस्पताल प्रालिसे सामाजिक सुरक्षा कोषसंगके सम्झौतापाछे कोषमे आवद्ध व्यक्तिनहे स्वास्थ्य उपचार सेवा प्रदान कैना औपचारिक रूपमे सुरु करले बा ।
अस्पताल ओ सामाजिक सुरक्षा कोषबीच हुइल सहकार्यसंगे अब योगदानकर्तासे अस्पतालसे टमान विशेषज्ञ स्वास्थ्य सेवा तथा उपचार सुविधा सहज रूपमे प्राप्त करे सेक्ही । अस्पतालके अध्यक्ष जनकराज जोशीके अनुसार कोषके योगदानकर्तासे प्रचलित व्यवस्था अनुसार स्वास्थ्य सेवा तथा सुविधाके लाभ लेहे सेक्ही । सेवा प्राप्त कैना सामाजिक सुरक्षा कोषके परिचयपत्र तथा आवश्यक कागजात अनिवार्य रूपमे साथमे ल्यानेपर्ना व्यवस्था करल बा ।
अस्पतालसे उपचार सेवामे लग्ना कुल खर्चके २० प्रतिशत रकम भर लाभग्राही स्वयं व्यहोरेपर्ना जानकारी डेहल बा । यी सेवाके विस्तारसंगे कैलालीसहित सुदूरपश्चिम प्रदेशके हजारौँ नागरिक प्रत्यक्ष रूपमे लाभान्वित हुइना अपेक्षा करल बा ।
सामाजिक सुरक्षा कोषसे देशभरके स्वास्थ्य संस्थासंग सहकार्य विस्तार करटी योगदानकर्ताहे गुणस्तरीय स्वास्थ्य सेवामे सहज पहुँच सुनिश्चित कैना नीति अनुरूप कैलाली अस्पतालसँग फे सेवा विस्तार करल जनैले बा । यिहीसे उपचारके लाग अन्यत्र जाईपर्ना बाध्यता कम हुइना ओ स्थानीयस्तरमे सहज तथा गुणस्तरीय सेवा प्राप्त हुइना विश्वास करल बा ।
कैलाली अस्पतालसे एक्के ठाउँसे बहुआयामिक स्वास्थ्य सेवा प्रदान करटी आइल बा । अस्पतालमे २४ सै घण्टा इमरजेन्सी, शल्यक्रिया, फार्मेसी तथा एम्बुलेन्स सेवा सञ्चालनमे बटै । साथे मुटुरोग, हाडजोर्नी, नसा, मिर्गौला, छाला तथा स्त्रीरोग सम्बन्धी विशेषज्ञ चिकित्सकमार्फत नियमित उपचार सेवा उपलब्ध करैटी आइल बा ।
अत्याधुनिक प्रविधिसहित आईसीयू, एनआईसीयू, भेन्टिलेटर, भिडियो एक्स–रे, इकोकार्डियोग्राफी, इन्डोस्कोपी लगायतके परीक्षण तथा उपचार सेवासमेत उपलब्ध रहल अस्पतालसे जनैले बा । दूरबिन (ल्याप्रोस्कोपिक) प्रविधिसे शल्यक्रिया सेवा सञ्चालन कैना अस्पतालके दुसर विशेषता हो ।
पछिल्का समय सुदूरपश्चिमके टमान जिल्लासँगे छिमेकी मुलुक भारतसे समेत बिरामी उपचारके लाग कैलाली अस्पताल पुग्न करल बटै । हाल ५० शैयाके क्षमतामे सञ्चालित अस्पतालहे निकट भविष्यमे १०० शैयामे विस्तार कैना तयारी हुइटी रहल अस्पताल जनैले बा ।
सामाजिक सुरक्षा कोषसँगके यी सहकार्यसे श्रमिक तथा योगदानकर्ताहे स्वास्थ्य सेवामे थप सहज पहुँच डेहुवाइक लाग साथे प्रदेशके स्वास्थ्य क्षेत्रहे थप मजबुत बनैना अपेक्षा करल बा ।
