सुदूरपश्चिम प्रदेशके ३७ अर्ब ७० करोड बजेट
पहुरा समाचारदाता
धनगढी २ असार । सुदूरपश्चिम प्रदेश सरकारसे आगामी आर्थिक बरस २०८३÷८४ के लाग चालु आर्थिक बरसके तुलनामे बह्राके बजेट लन्ले बावै ।
आर्थिक मामिलामन्त्री विक्रमसिंह धामी सोम्मारके अढ्ढा रात प्रदेश सभामे ३७ अर्ब ७० करोड रुपियाँके बजेट प्रस्तुत करल रहिट । सरकारके इ बजेट हालसमके सबसे ढेर रहल बा । चालु आर्थिक बरसके सम्भावित बचत, आन्तरिक राजस्व वृद्धि ओ प्राकृतिक स्रोतसे प्राप्त हुइना आम्दानीहे आधार बनाके बजेटके आकार बह्राइल जनाइल बा ।
प्रदेश सरकारसे बजेट सार्वजनिक करक लाग सुरुमे दिनके पाँच बजे प्रदेश सभाके बैठक बोलाइल रहे मने सत्तारूढ दल नेकपा (एमाले) से सिफारिस करल आयोजना, प्रदेश सभा सदस्यके क्षेत्रगत योजना ओ मन्त्रालयगत बजेट व्यवस्थापनके विषयमे असहमति जनाइलपाछे बैठक रातके सारल रहे । प्रतिपक्षी दल नेपाली कम्युनिस्ट पार्टी भर मध्यरात बजेट प्रस्तुत करे परल कारण खोजी कैटी सभाके बैठक बहिष्कार कैके बाहर हुइल रहे ।
उहीसे आघे पहिल बजेटके रूपमे प्रदेश सरकारसे आर्थिक बरस २०७४÷७५ मे एक अर्ब दुई करोड पाँच लाखके आंशिक बजेट लानल रहे । ओस्टके आर्थिक बरस २०७५÷७६ मे २५ अर्ब छ करोड ५६ लाख, आर्थिक वर्ष २०७६÷७७ मे २९ अर्ब २३ करोड ३० लाख, आर्थिक वर्ष २०७७÷७८ मे ३४ अर्ब ६४ करोड ३९ लाख रुपियाँ इ प्रदेशके बजेट रहल रहे ।
ओस्टके आर्थिक बरस २०७८÷७९ मे ३१ अर्ब १७ करोड ५६ लाख, आर्थिक वर्ष २०७९÷८० मे ३६ अर्ब ३३ करोड ९ लाख, आर्थिक वर्ष २००÷८१ मे २९ अर्ब २६ करोड ५९ लाख रुपियाँके बजेट प्रदेश सरकारसे लानल रहे । आर्थिक वर्ष २०८१÷८२ मे ३१ अर्ब ६२ करोड ९८ लाख रुपियाँ प्रदेश सरकारके बजेट रहल रहे । सरकारके चालु आर्थिक बरसके बजेट ३३ अर्ब ४५ करोड ५१ लाख रुपियाँ रहल बा ।
