लागुऔषध सहित अक्के दिनमे १५ जाने पक्राउ
पहुरा समाचारदाता
धनगढी, ९ सावन । कैलाली जिल्लाके अलग अलग ठाउँसे एक्के दिनमे अवैध लागु औषधसहित १५ जाने पक्राउ परल बटै ।
कैलालीके कैलारी गाउँपालिका–५ गोबरैला घाटसे अवैध लागुऔषध खैरो हेरोइन ४ सय ४७ मिलिग्राम ओ नगद ११ हजार ५ सय रूप्यासहित २ जनहनहे शुकके प्रहरी पक्राउ करले बा ।
पक्राउ परुइयामे उहे गाउँपालिका–७ भुईयाफाँटा बैठना २३ वर्षीय अमन चौधरी ओ भजनी नगरपालिका९ पचमुडिया बैठना २७ वर्षीय निराजन चौधरी रहल बटै ।
इलाका प्रहरी कार्यालय हसुलिया समेतसे खटल प्रहरी ओइनहे उ पदार्थ सहित पक्राउ करले बा ।
ओस्टेक करके कैलालीके मोहन्याल गाउँपालिका–७ पितमारीस्थित कर्णाली एडभेन्चर रिसोर्टसे अवैध लागुऔषध खैरो हेरोइन १ सय २० मिलिग्राम सहित २ जनहनहे शुकके प्रहरी पक्राउ करले बा ।
पक्राउ परुइयामे उहे ठाउँ बैठना २३ वर्षीय विनोद बिष्ट ओ लम्कीचुहा नगरपालिका–३ चिसापानी टुक्कीबजार बैठना कालिकोट रास्कोट नगरपालिका–४ घर रहल २५ वर्षीय गोविन्द्र शाही रहल बटै ।
इलाका प्रहरी कार्यालय चिसापानीसे खटल प्रहरी ओइनहे उ पदार्थ सहित पक्राउ करले बा ।
ओस्टेक करके धनगढी उ.म.न.पा.८ क्याम्पस चोकसे अवैध लागुऔषध खैरो हेरोइन ४ ग्राम ३२३ मिलिग्राम सहित ४ जनहनहे शुकके साँझ प्रहरीसे पक्राउ करले बा ।
पक्राउ परुइयामे उहे ठाउँ बैठना बर्ष २८ के आयुष सिंह, उहे उ.म.न.पा.२ बैठना बर्ष ३४ के जय बहादुर भण्डारी, वडा–१० बैठना बर्ष ३० के टेकेन्द्र बस्नेत ओ कैलारी गा.पा.२ घर रहल हाल वडा–८ क्याम्पस चोक कोठा करके बैठना बर्ष २५ के श्रीमल चौधरी रहल बटै ।
जिल्ला प्रहरी कार्यालय कैलाली ओ लागुऔषध नियन्त्रण व्युरो शाखा कार्यालय धनगढीसे संयुक्त रुपमे खटल प्रहरी श्रीमल चौधरीके कोठामे लागुऔषध सेवन करटी रहल अवस्थामे कोठा खानतलासी करेबेर उ पदार्थ फेला पारके उ पदार्थ सहित चारु जनहनहे पक्राउ करले बा ।
ओस्टेक करके कैलाली टिकापुर न.पा. १ समितिपुरसे अवैध लागुऔषध खैरो हेरोइन ४०० मिलिग्राम सहित २ जनहनहे शुकके साँझ प्रहरी पक्राउ करले बा । पक्राउ परुइयामे उहे ठाउँ वैठना बर्ष २८ के सागर खत्री ओ १८ वर्षिय किशोर रहल बटै ।
इलाका प्रहरी कार्यालय टिकापुर, कैलालीसे खटल प्रहरीसे शंका लागके चेकजाँच करेबेर उ पदार्थ फेला पारके उ पदार्थ सहित पक्राउ करले बा ।
ओस्टेक करके कैलालीके गोदावरी न.पा.५ गेटा सुकुम्वासी टोलसे अवैध लागुऔषध गाँजा ३७० ग्राम सहित उहे ठाउँ वैठना वर्ष ४५ के खडक डंगौराहे शुकके साँझ प्रहरी पक्राउ करले बा । विशेष सूचनाके आधारमे प्रहरी चौकी गेटा, कैलालीसे खटल प्रहरी हुकान घरकोठा खानतलासी करेबेर प्लाष्टिकके डिव्वा भिटर लुकाइ छिपाई धारल अवस्थामे उ पदार्थ फेला पारके उ पदार्थ सहित पक्राउ करले बा ।
ओस्टेक करके कैलालीके धनगढी उ.म.न.पा.१७ पथरी पुलसे अवैध लागुऔषध खैरो हेरोइन ३३५ मिलिग्राम सहित २ जनहनहे शुकके साँझ प्रहरी पक्राउ करले बा ।
पक्राउ परुइयामे उहे ठाउँ बैठना बर्ष २६ के राजेश राना ओ बर्ष २५ के किरन राना रहल बटै । जिल्ला प्रहरी कार्यालय कैलाली ओ लागुऔषध नियन्त्रण व्युरो शाखा कार्यालय धनगढीसे संयुक्त रुपमे खटल प्रहरी शंका लागके चेकजाँच करेबेर उ पदार्थ फेला पारके उ पदार्थ सहित पक्राउ करले बा ।
ओस्टेक करके कैलाली धनगढी उ.म.न.पा. ७ जि.पी. चोकसे अवैध लागुऔषध खैरो हेरोइन २३८ मिलिग्राम सहित २ जनहनहे शुकके रात प्रहरी पक्राउ करले बा ।
पक्राउ परुइयामे उहे ठाउँ बैठना बर्ष २५ के विकास जेठारा ओ बर्ष २८ के बिबेक राज उपाध्याय रहल बटै । जिल्ला प्रहरी कार्यालय कैलालीसे खटल प्रहरी शंका लागके चेकजाँच करेबेर उ पदार्थ फेला पारके उ पदार्थ सहित पक्राउ करले बा । यी सम्बन्धमे प्रहरी आवश्यक अनुसन्धान करटी रहल बा ।
