सुदूरपश्चिममे सेनाके हेलिकप्टरसहित विपद् प्रतिकार्य तयारी अवस्थामे

पहुरा समाचारदाता
धनगढी, ८ कुवाँर । आगामी शुकसे तीन दिनसम देशके टमान स्थानमे भारीसे अतिभारी वर्षाके पूर्वानुमान करल सुदूरपश्चिम प्रदेशमेफे सजकता अपनैटी विपद् प्रतिकार्यके लग सरोकारवाला संयन्त्र तयारी अवस्थामे राखल बा ।

सम्भावित वर्षातमे उच्च जोखिममे रहल बझाङ, बाजुरा, दार्चुला ओ अछाममे उच्च सर्तकता अप्नैना ‘एलर्ट’ जारी करल जल तथा मौसम विज्ञान कार्यालय अत्तरीया, कैलालीके निमित्त प्रमुख सञ्जयकुमार शाह जानकारी देलै । “चुरे क्षेत्रमे वर्षात् हुइ सेक्ना इ दुई जिल्लाहे फे उच्च जोखिममे राखल एर्लट करल बा ।”

उच्च जोखिममे राखल सुदूरपश्चिमके पहाडी जिल्ला दार्चुलाके प्रमुख जिल्ला अधिकारी वर्तराज पौडेल सम्भावित वर्षापाछे उत्पन्न हुइसेक्ना विपद्के परिस्थितिसे बच्न नागरिक तहसम सुचना जारी बरल बटैलै ।

उहाँ कहलै, “सडक अवरुद्ध हुइल तत्काल सञ्चालन कैना स्काभेटर तयारी अवस्थामे राख्नाके साथे दुई महिनासमके लग खाद्यान्नके बन्दोबस्त करल बटी ।” उहाँसे स्रोतसाधनसे हुइलसमके तयारी करल बटैलै ।

ओस्टेक करके बझाङके प्रमुख जिल्ला अधिकारी मुकेशकुमार केशरी गृह मन्त्रालयसँगे समन्वय करके पूर्वतयारीबारे छलफल हुइटीरहल बटैलै । उहाँ कहलै, “बझाङहे उच्च जोखिममे राखल उहे अनुसार विपद् प्रतिकार्य तयारी हुइटीरहल बा ।”

स्थानीय प्रशासनके साथे सुदूरपश्चिममे सुरक्षा संयन्त्रहेफे सम्भावित विपदसे क्षति कम करेक लग विपद् प्रतिकार्य तयारी तीव्र पारल बटै । सशस्त्र प्रहरी बल श्री नं ७ वैद्यनाथ बाहिनी अत्तरीयाके सशस्त्र प्रहरी बरिष्ठ उपरीक्षक रमेशकुमार पाण्डेयसे मौसम पूर्वानुमान महाशाखासे आइल खबर अनुसार सशस्त्र प्रहरी बलसे विपद् प्रतिकार्य तयारी करल जानकारी देलै ।

“उ अवधिमे शसस्त्र प्रहरी कर्मचारीहे बिदा देहल नै हो, सुदूरपश्चिमे तैनाथ शसस्त्र प्रहरी युनिटके साथे विपद्के लग यहाँ १४ ठो अस्थायी विपद् सुरक्षा वेश तयारी अवस्थामे राखल बा । सरोकारवाला निकाय ओ सुरक्षा संयन्त्रबीच समन्वय हुइटीरहल बा”, उहाँ कहलै ।

बङ्गालके खाडीके मध्य भू–भाग आसपास रहलके न्यून चापीय क्षेत्र थप शक्तिशाली बन्टी गिलके ओ ओकर प्रभाव नेपालमेफे पर्ना बटाइल बा । भारी वर्षाके कारण बाढ, पहिरो ओ डुबानके जोखिम हुइ सेक्ना हुइल आवश्यक सतर्कता अपनैना सुरक्षा समितिहे प्रतिकार्य तयारी करटीरहल बटै ।

नेपाली सेनासेफे सुदूरपश्चिम प्रदेशमे विपद् प्रतिकार्य तयारी पुरा हुइसेकल जनैले बा । प्रभावित नागरिकके उद्धार ओ राहतके लग सेनासे सुदूरपश्चिम पृतनामे हेलिकप्टर तयारी अवस्थामे राखल नेपाली सेना जनैले बा ।