चैतन्य पाठशाला अन्तरविद्यालय शिक्षक फुटसल प्रतियोगिता हुइना
पहुरा समाचारदाता
धनगढी, १९ कुँवार । चैतन्य स्पोट्र्स एकेडेमी, धनगढीके आयोजनामे चैतन्य पाठशाला अन्तरविद्यालय शिक्षक फुटसल प्रतियोगिता–२०८३ आयोजना हुइना हुइल बा । पाठशालासे सोम्मारके पत्रकार सम्मेलन कैटी प्रतियोगिताबारे जानकारी कराइल हो ।
प्रतियोगिता इहे कुँवार २४ ओ २५ गते चैतन्य पाठशालाके फुटसल कोर्टमे सञ्चालन हुइना जानकारी डेहल बा । सुदूरपश्चिम प्रदेश खेलकुद परिषद्मा दर्ता होके सञ्चालनमे रहल चैतन्य स्पोट्र्स एकेडेमीसे शिक्षक तथा शिक्षाकर्मीहे कक्षाकोठासे बाहर खेलमैदानमे जोर्ना उद्देश्यसे प्रतियोगिता आयोजना करे लागल जनाइल बा ।
“कक्षाकोठासे खेलमैदानसम सिखैना, खेल्ना ओ प्रेरणा डेना शिक्षक” कना नाराके साथ आयोजना हुइना प्रतियोगितासे शिक्षक तथा शिक्षाकर्मीबीच खेलभावनाके विकास, स्वस्थ प्रतिस्पर्धाके प्रवद्र्धन, टमान विद्यालय तथा शैक्षिक संस्थाबीच व्यावसायिक सम्बन्ध सुदृढीकरण ओ सामूहिक कार्यभावनाके विकासमे योगदान पुगैना विश्वासके साथ प्रतियोगिता करे लागल जनाइल बा ।
कक्षाकोठामे सिखैना अनुशासन, सहकार्य, सम्मान ओ सिकाइके मूल्य खेलमैदानमे समेत व्यवहारमे उटारे सेकजैना हुइल ओरसे शिक्षकबीच आपसी सद्भाव, मित्रता ओ स्वस्थ प्रतिस्पर्धाके वातावरण निर्माण करक लाग प्रतियोगिता आयोजना करे लागल पाठशालाके निर्देशक कटकबहादुर सिंह बटैलै ।
उहाँ प्रतियोगिताके विजेता टोलीहे नगद ५० हजार रुपैयाँसहित च्याम्पियनसिप ट्रफी, स्वर्ण पदक ओ प्रमाणपत्र प्राप्त कैना बटैलै । डोसर हुउइया टोलीहे नगद २५ हजार रुपैयाँ, ट्रफी, रजत पदक तथा प्रमाणपत्र प्रदान कैना उहाँ बटैलै ।
ओस्टके, प्रतियोगिताके उत्कृष्ट खेलाडी ओ उत्कृष्ट गोलरक्षकहे जनही नगद ३ हजार रुपैयाँसहित ट्रफी ओ प्रमाणपत्र प्रदान करजैना बा । प्रतियोगितामे सहभागी हुउइया टोली ७ हजार रुपैयाँ दर्ता शुल्क बुझाइ पर्ना जनाइल बा । टोली दर्ता कुँवार २१ गतेभिट्टर करसेके पर्ना जनाइल बा ।
