चौमालामे एकीकृत महिला स्वास्थ्य शिविर सम्पन्न
पहुरा समाचारदाता
धनगढी, २४ कुवाँर । कैलालीके गौरीगंगा नगरपालिकाके आयोजनामे ओरेकसंगके सहकार्यमे गौरीगंगा नगरपालिका वडा नं २ चौमलाके स्वास्थ्य चौकीमे एक दिने एकिकृत महिला स्वास्थ्य शिविर सम्पन्न हुइल बा ।
उ शिविरसे महिला स्त्री रोग बिशेषज्ञ डा. से चेकजाँच तथा परामर्श, ७० जानेक एचपीभी डिएनए बिधिसे पाठेघरके मुखके क्यान्सर परीक्षणके लाग स्वाब संकलन, २८ जानेक भिआइए बिधिसे पुन पाठेघरके मुखके क्यान्सर परीक्षण करके पोजेटिभ डेखल १२ जानेक पाठेघरके सेकाई बिधिसे थप उपचार, ७३ जनहनहे समस्या अनुसारके निशुल्क औषधी, २ जानहे रिग्ङ पेसिर सेवा १२२ जानेक स्तन क्यान्सरके परीक्षण, एबलाटिभ ट्रिटमेन्ट १२ जाने ओ जतिल समस्या हुइल ओ थप उपचार आवश्यक रहल ५ जनहनहे सेती प्रादेशिक अस्पताल सिफारिस ओ ७५ जनहनहे ब्यक्तिगत परामर्श तथा सयपत्री बाटचित ५ ठो वटा लैंगिक हिसाके घट्ना अभिलेखिकरण ओ १२२ जनहनहे टमान बिषयमे अभिमुखीकरण ओ सचेतना मुलक पर्चा पम्पलेट बितरण कैना कार्य हुइल ओरेक जिल्ला संयोजक गीता चौधरी जनैली ।
महिलाके यौन तथा प्रजनन स्वास्थ्य सम्बन्धी समस्याहे लाज डर ओ संकोचके विषय मन्न सामाजिक सोचसे महिलाहे समस्या नुकाके बैठना बाध्य बनाइठ ।
समयमे स्वास्थ्य सेवा, परामर्श ओ सहयोग नैपाके महिलाहुक्रे विभेद, अपहेलना, मानसिक तनाव तथा हिंसाके जोखिममे परे सेक्ठै । आत्मसम्मान ओ जीवनके गुणस्तरमे नकारात्मक असर पारे सेकठ, साथे असमान शक्ति सम्बन्ध ओ सामाजिक विभेद सँग जोरेबेर हिंसाके जोखिम समेत बह्रे सेकठ । टबमारे महिलाके यौन तथा प्रजनन स्वास्थ्यहे लाजके विषय नाही, अधिकार ओ स्वास्थ्यके महत्वपूर्ण सवालके रूपमे बुझ्न आवश्यक बा ।
एकीकृत महिला स्वास्थ्य शिविर मार्फत महिलाके स्वास्थ्य सेवामे सहज पहुँच सुनिश्चित करटी यौन तथा प्रजनन स्वास्थ्य सम्बन्धी समस्या पहिचान, परामर्श, उपचार तथा आवश्यक सेवामे पहुँच विस्तार कैना आजके आवश्यकता हो । महिलाके स्वास्थ्य, सम्मान ओ सुरक्षित जीवन सुनिश्चित कैना परिवार, समुदाय ओ सरोकारवाला सक्कुहुनके सक्रिय भूमिका आवश्यक बा । यौन तथा प्रजनन स्वास्थ्यमे सहज पहुँच सुनिश्चित करटी महिलाउप्पर हुइना हिंसा न्यूनीकरणके लाग एकीकृत महिला स्वास्थ्य शिविर आवश्यक रहल बा । यिहे क्रममे गौरीगंगा नगरपालिका वडा नं २ चौमलाके स्वास्थ्य चौकीमे १ दिने एकिकृत महिला स्वास्थ्य शिविर सम्पन्न हुइल हो ।
