‘हमार सुदूरपश्चिम, हम्रे चिन्हैबी’ अभियानअन्तर्गत २१ ठो बुकलेट विमोचन
पहुरा समाचारदाता
धनगढी, २६ कुवाँर । सुदूरपश्चिम प्रदेशके धार्मिक, ऐतिहासिक तथा पर्यटकीय स्थलके प्रचारप्रसार कैना उद्देश्यसे धनगढी उपमहानगरपालिकासे सञ्चालित ‘हमार सुदूरपश्चिम, हम्रे चिन्हैबी’ अभियानअन्तर्गत २१ ठो बुकलेट विमोचन करल बा ।
धनगढीके जेन्जी मार्गमे एलइडी बोर्डके उदघाटन कार्यक्रमसंगे आयोजित कार्यक्रममे उपस्थित विशिष्ट अतिथिहुक्रे अभियानअन्तर्गत तयार पारल बुकलेट विमोचन करल हुइट ।
विमोचित बुकलेटमे रामारोशन क्षेत्र, सालमुनी, पादुका त्रिवेणी धाम, बैद्यनाथ धाम, भागेश्वर मन्दिर, पञ्चदेवल विनायक, जगन्नाथ मन्दिर, पाताल भुवनेश्वर, भुइँया, अमरगढी किल्ला, शैल्य शिखर मालिकार्जुन मन्दिर, उदयदेव मन्दिर, अजमेरकोट, त्रिपुरा सुन्दरी, उग्रतारा मन्दिर, बेहडाबाबा धाम, घटालबाबा, पद्म प्रकाशेश्वर महादेव, शिवपुरी धाम, गुम्बा ओ देवथान समेटल बटै ।
यी आघे अपि हिमाल ओ शैलेश्वरीके बुकलेट विमोचन हुसेकल ओरसे धनगढी उपमहानगरपालिकासे जम्मा २३ ठो बुकलेट प्रकाशन करसेकल जनैले बा ।
सुदूरपश्चिममे रहल धार्मिक आस्थाके केन्द्र, ऐतिहासिक सम्पदा तथा प्राकृतिक सौन्दर्यसे भरिपूर्ण पर्यटकीय गन्तव्यके पहिचान ओ महत्वबारे जानकारी करैना उद्देश्यसे बुकलेट तयार पारल हुइट ।
प्रचारप्रसारके अभावमे ओझेलमे परल पर्यटकीय गन्तव्यहे राष्ट्रिय तथा अन्तर्राष्ट्रिय स्तरमे चिन्हैना, आन्तरिक तथा बाह्य पर्यटक आकर्षित कैना ओ प्रदेशके पर्यटन सम्भावना उजागर कैना अभियानके लक्ष्य रहल बा ।
‘हमार सुदूरपश्चिम, हम्रे चिन्हैबी’ अभियानसे सुदूरपश्चिमके धार्मिक, सांस्कृतिक तथा ऐतिहासिक पहिचानहे व्यापक बनैटी पर्यटन प्रवद्र्धनमे योगदान पुगैना अपेक्षा करल बा ।
