धनगढी १२ शिव तथा हनुमान मन्दिर धाममे ४४ औँ हाइमास लाइट उदघाटन
पहुरा समाचारदाता
धनगढी, २७ कुवाँर । धनगढी उपमहानगरपालिकाके ‘उज्यालो धनगढी’ कार्यक्रमअन्तर्गत धनगढी १२ शिव तथा हनुमान मन्दिर धाममे ४४ औँ हाइमास लाइट जडान करके सञ्चालनमे ल्यानल बा ।
धनगढी उपमहानगरपालिका वडा नम्बर १२ स्थित शिव तथा हनुमान मन्दिर धाममे जडान करल हाइमास लाइटके वडा नम्बर १२ के अध्यक्ष शेरबहादुर महरा उदघाटन करल हुइट ।
उपमहानगरपालिकाके अनुसार ‘उज्यालो धनगढी’ कार्यक्रमअन्तर्गत नगरके टमान स्थानमे हाइमास लाइट जडान कैना कार्यहे निरन्तरता डेहल बा । उहे अभियानअन्तर्गत वडा नम्बर १२ हनुमान मन्दिरमेफे हाइमास लाइट जडान करल हो ।
व्यस्त तथा सार्वजनिक आवागमनके महत्वपूर्ण क्षेत्र ओ धार्मिक क्रियाकलाप हुइना हुइल ओरसे यहाँ हाइमास लाइट सञ्चालनमे आइलपाछे रातके समयमे हुइना आवागमन तथा सार्वजनिक गतिविधिमे सहजता हुइना अपेक्षा करल बा । उपमहानगरपालिकासे नगरके टमान क्षेत्रहे थप ओजरार, सुरक्षित ओ व्यवस्थित बनैना उद्देश्यसहित ‘उज्यालो धनगढी’ कार्यक्रम सञ्चालन करटी रहल जनैले बा ।
