दिपावलीके लाग गेंदा फूला तयार

पहुरा समाचारदाता
धनगढी, १८ कार्तिक । कैलालीके कैलारी गाउँपालिका–६ दुई कृषक समुहसे करल गेंदा (सयपत्री) फूला दिपावलीके लाग तयार हुइल बा ।
फूला खेतीमे संलग्न दुई कृषक समूहसे अपन उत्पादन करल फूला तयार हुइल जनैटि बजारीकरण तथा बिक्री वितरणके लाग आवश्यक सहयोग ओ बजार व्यवस्थापन कैडेना सरोकारवालासँग आग्रह करले बटैं ।
कैलारी गाउँपालिका वडा नं. ६, मसुरियामे रहल सालघारी कृषक समूह ओ वडा नं. ६, खरेटीमे रहल गौरव कृषक समूह सयपत्री फूल खेतीमे संलग्न रहल बा ।
सालघारी कृषक समूहके सम्पर्क व्यक्ति राजकुमारी चौधरी (९८६८५३१७०७) रहल बटी कलेसे गौरव कृषक समूहके सम्पर्क व्यक्ति बुधराम चौधरी (९७६९९१५९४५) रहल बटैं ।

यी दुनु कृषक समूहसे व्यावसायिक रूपमे सयपत्री फूल खेती करटि आइल बा । उहाँहुक्रे उत्पादन करल फूलाहे उचित बजारसम पुगैना, बिक्री वितरणके व्यवस्था मिलैना तथा बजारसँग प्रत्यक्ष सम्बन्ध स्थापित करना सहयोग आवश्यक रहल जनाइल बा ।
स्थानीय स्तरमे फूल खेतीहे प्रोत्साहन करनाके साथे कृषकके उत्पादनसे उचित मूल्य पैना वातावरण निर्माण करना बजारसँगके सम्बन्ध विस्तार करेपरना आवश्यकता डेखाइल बा ।
यकर लाग सम्बन्धित निकाय, व्यापारी, फूला व्यवसायी तथा अन्य सरोकारवालाहे कृषक समूहसँग समन्वय कैके उत्पादित सयपत्री फूलाके बजारीकरणमे सहयोग करना आग्रह करल बा ।
साहास नेपाल लिफ्ट परियोजना मार्फत फूल खेतीके लाग सहयोग करल उ परियोजनाके सिनियर कृषि प्राबिधिक नहबहादुर जिरेल बटैलैं । अइसिन सहयोगसे स्थानीय उत्पादनके प्रवद्र्धन, कृषकके आयआर्जन वृद्धि ओ कृषि व्यवसायहे व्यावसायिक बनैना सहयोग पुग्न उहाँ बटैलैं ।