संस्कृति संरक्षणसंगे पुस्तान्तरण आवश्यक बाः प्रदेश सभासदस्य धनश्याम

पहुरा समाचारदाता
धनगढी, २८ कार्तिक । कैलाली जिल्लाके कैलारी गाउँपालिका वडा नम्बर ५ पवेरामे लवाङगी भजहर तथा योजनाबारे जानकारी कार्यक्रम हुइल बा ।
पवेरा गाउँ समाजके आयोजनामे गाउँक भल्मन्सा रामबहादुर कठरियाके अध्यक्षतामे हुइल कार्यक्रममे वरका पहुना सुदूरपश्चिम प्रदेश सरकार पुर्व आर्थिक मामिला मन्त्री तथा प्रदेश सभा सदस्य घनश्याम चौधरी ओ विशिष्ट पहुना वडा नम्बर ५ के वडा अध्यक्ष विष्णु प्रसाद चौधरी रहल रहिट । कार्यक्रममे सम्बोधन करटी वरका पहुना प्रदेश सभा सदस्य घनश्याम चौधरी पवेरा गाउँमे कठरिया थारु ओ डगौरा थारुके मिलल बस्ती ओ यहाँ संस्कृतिके धनी रहल कहटी यिहीहे संरक्षण संरक्षण पुस्तान्तरण आवश्यक रहल बटैलै । उहाँ कहलै, संस्कृति कहलेक हमार पहिचान हो । यिहीहे जोगैनाकेसंगे पुस्तान्तरण करलेसे जोगे सेकी नइकी लोप हुइटी जाई । एक समय असिन रहे । हमार पहिरन ओ गरगहना लोप हुई लागल रहे । अब्बे फेरसे बचाई परठ कना मनोभावना बह्रटी । हमार पहिरन, नाँच गान प्रति विदेशी समेट चासो राखे लागल कहटी हम्रे झन बचाई परठ । लोप हुइलेसे कौनोफे विश्व विद्यालयमे खोज्लेसे नैमिली ।

उहाँ प्रदेश सरकारसे गाउँघर केन्द्रीत योजना डेहे लागल कहटी कैलारी–५ पवेरामे बरघर भवन सामुदायिक भवनके बजेट विनियोजन करल जानकारी डेलै । उ भवनके लाग २० लाख रुप्या विनियोजन करल बा ।
ओस्टेक सुर्मिनाला बडैपुर सडकमे २ करोड, वनदेवी मन्दिर जाईक लाग कटैनी लडियामे पुल निर्माण हुइटी रहलफे बटैलै ।
कैलारी गाउँपालिका वडा नम्बर ५ के वडा अध्यक्ष विष्णु प्रसाद चौधरी गाउँपालिकासे पवेरा गाउँमे सडक स्तारोन्ती ओ ग्राभेलके लाग ९ लाख रुप्या विनियोजन करल बटैलै । उहाँ योजना संचालनके बजेट विनियोजना करल बा । कौनो विवाद नैहुई कलेसे औरे बरस फेरसे बजेट विनियोजन करेसेक्ना बटैलै ।
कैलारी गाउँपालिकाके योजना शाखा प्रमुख सन्तोषकुमार चौधरी प्रदेश सरकारसे बडघर भवनके लाग विनियोजन करल बजेट गाउँपालिकाहे हस्तान्तरण हुइल कहटी हालि निर्माणके काम आघे बह्रना बटैलै । ओस्टेके उहाँ पवेरा गाउँमे माटो फिलिङ ओ ग्राभेलके लाग उपभोक्त समिति गठन हुइल कहटी हाली काम सुरु हुइना बटैलै । पवेरा गाउँमे सांस्कृतिक कार्यक्रम हुई छोरल कहटी संस्कृति जोगाइक लाग यिहीहे निरन्तरता डेहे पर्ना बटैलै ।

कार्यक्रममे कलाकार चन्द्र चौधरी, गुर्गी सिचाई आयोजनाके अध्यक्ष भीष्म चौधरी, पत्रकार प्रेम चौधरीलगायत मन्तव्य राखल रहिट । कार्यक्रमके बारे जानकारी पवेरा गाउँ समाजके सहसचिव परसराम चौधरी ओ स्वागत मन्तव्य समाजके उपाध्यक्ष प्रेम बहादुर चौधरी राखल रहिट ।
कार्यक्रममे संचालन विविनता कठरिया करल रहिट । लवाङ्गी भजहर कार्यक्रममे पवेराके होरी ओ बंगालीपुरके झुम्रा नाँच डेखागिल रहे ओ पच्रा फेन सुना गिल रहे । लवाङ्गी भजहरमे गुरुवा देशराम चौधरी ओ केशौका शिवचरण डंगौरा पुजा करल रहिट ।