बोक्सीनीय कहटी महिला पिटुइया वडा सदस्य पक्राउ

पहुरा समाचारदाता
धनगढी, १ चैत । बोक्सी कहटी महिलाउप्पर कुटपिट करल आरोपमे वडा सदस्य पक्राउ परल बाटै । कैलारी गाउँपालिका वडा नम्बर २ के वडा सदस्य रामकुमार चौधरी ओ उहाँक छावा राजु चौधरी महिलाहे कुटपिट करल आरोपमे पक्राउ परल बाटै ।
‘बेराम हुइल ओरसे गाउ“मे रहल गुरुवाक घर गैनु । वडा सदस्य फेन उहैं आइलै । एक्फाले महिन कुटपिट करे लग्लै, कैलारी गाउ“पालिका वडा नम्बर २ के स्थानीय ३७ वर्षिय महिला कहली, ‘कुटपिट करे लागल थाहा पाइलपाछे स्थानीयहुक्रे बचैलै ।’ घटना यिहे फागुन २७ गतेक रलेसे फेन जाहेरी भर बिफेक रोज इलाका प्रहरी कार्यालय हसुलियामे दायर हुइल ।
हसुलिया प्रहरी कार्यालयमे जाहेरी दर्ता हुइलपाछे वडा सदस्य रामकुमार चौधरीसहित उहाँक छोवा राजु चौधरीहे प्रहरी पक्राउ करले बा । कैलाली जिल्ला प्रहरी कार्यालयके प्रवक्ता एवं प्रहरी नायव उपरिक्षक दक्षकुमार बस्नेत उहाँहुकनहे पक्राउ कैके थप अनुसन्धानके लाग कैलाली जिल्ला अदालतसे पाँच दिनके म्याद थप करल बटैलै ।
वडा सदस्य रामकुमार चौधरी उ महिलाहे बोक्सी कटी कुटपिट करल प्रत्यक्षदर्शीहुक्रे बटैलै बाटै । वडा सदस्य राम कुटपिट करेबेर स्थानीयहुक्रे बचैना प्रयास कैले रहिट । प्रत्यक्षदर्शी कहलै, ‘महिलाहे बचैना क्रममे वडा सदस्यहे समेत चोट लागल रहे ।’
महिलाक् भैया कहलै, ‘वडा सदस्य रामकुमारके छावा राजु बेरबेर बोक्सी कटी गालीगलौज करिट ।’