कैलारीके बजेट ६३ करोड ३८ लाख

पहुरा समाचारदाता
धनगढी, १० असार । कैलारी गाउँपालिकाके आर्थिक वर्ष ०८३÷०८४ सालके लाग ६३ करोड ३८ लाख २० हजारके बजेट प्रस्तुत कैगिल बा ।

गाउँपालिका अध्यक्ष राजसमझ चौधरीके अध्यक्षतामे हुइल गाउँसभाके दुसरा सभा अधिवेशनमे गाउँपालिका उपाध्यक्ष भगवतीकुमारी चौधरी संघीय सरकारसे रु ५५ करोड १७ लाख ४१ हजार प्रदेश सरकारसे ३ करोड २० लाख ७९ हजार प्राप्त हइल सिलिङ तथा गाउँपालिकाके आन्तरिक आय २ करोड ओ गाउँपालिकाके चालु आर्थिक बर्षके आल्य रु ३ करोड करके कुल ६३ करोड ३८ लाख २० हजारके बजेट प्रस्तुत करल रहिट ।

ओस्टेक करके गैरसरकारी संघ संस्थाके रु ४ करोड ६० लाख ७२ हजारके बजेट तथा कार्यक्रम प्राप्त हुइल उहाँ जनैली ।
आर्थिक बर्ष २०८३÷०८४ सालके लाग पुँजीगत ओर रु १४ करोड ९९ लाख ३७ हजार, ओ चालु ओर रु ४८ करोड ३८ लाख ८३ हजार बजेट विनियोजन करल गाउँपालिका उपाध्यक्ष जनैली । गाउँसभा बैठकमे उहाँ आर्थिक बर्ष २०८३÷०८४ सालके लाग आर्थिक विद्येयक ओ विनियोजन विद्येयकफे प्रस्तुत कैगिल बा ।

गाउँसभा सभा वैठकमे गाउँसभा सदस्यहुक्रे, प्रमुख प्रशासकीय अधिकृत दलबहादुर धामी, सामाजिक विकास शाखा प्रमुख यगम कलेललगायत टमान शाखाके प्रमुखहुकनके सहभागिता रहल रहे ।

ओस्टेक करके नीति तथा कार्यक्रममे जेन–जी आन्दोलनके क्रममे क्षतिग्रस्त हुइल वडा कार्यालयके भवनहे मर्मत संभार करके अइना आर्थिक वर्ष भिटर संचालनमे ल्यन्ना कहल बा । गाउँपालिका अन्तर्गत क्रियाशील राजनीतिक दल, नागरीक समाज, बुद्धिजीवी, भलमन्सा लगाएतके सरोकारवालासंग समन्वय तथा सहकार्यमे गाउँपालिका भिटरके ज्वलन्त मुद्दा वाल विवाह, लागु औषध दुव्र्यसनी, जैसिन विषयमे “ हिसां रहित समाजके परिकल्पना, स्थानीय सरकारके अपेक्षा ओ चाहाना” के नीति अवलम्वन कैजैना बा । नेपाल सरकारसे अन्तराष्ट्रिय जगतमे सन २०३० सम प्रतिवद्वता करल बालमैत्री स्थानीय शासन घोषणा कैना नीतिहे आत्मसाथ करटी वालमैत्री स्थानीय शासन घोषणाके साथे पोषणमैत्री वडा घोषणा कार्यक्रमहे व्यापक रुपमे कार्यान्वयन करेक लाग सम्वद्ध सरोकारवालासंग समन्वय तथा सहकार्य कैजैना बा ।

कैलारी गाउँपालिकामे निर्मित १५ शैया आधारभूत अस्पतालहे हाली संचालनमे ल्यन्नाके साथे उ अस्पतालहे नेपाल सरकार ओ प्रदेश सरकारसंग समन्वय सहकार्य करके सिकेलसिल अस्पतालके रुपमे विकास कैजैना बा । कैलारी गाउँपालिकाके नागरिकके विकास प्रतिके तिब्र चाहनाके साथे रुपान्तरित तथा सम्वृृद्ध कैलारी निर्माणके लाग ५ वर्षे आवधिक योजना निर्माण करके कार्यान्वयन कैना बा ।

सम्बृद्ध कैलारी गाउँपालिकाके अवधारणाअ‍े मुर्तरुप प्रदान कैना पूर्वाधार विकास, आर्थिक सम्बृद्धि तथा स्वरोजगार सृजना, वातावरण संरक्षण तथा विपद व्यवस्थापन ओ सामाजिक रुपान्तरण तथा समावेशीकरणके कार्यक्रम प्रभावकारिताके साथ कार्यान्वयन करही ।

कैलारी गाउँपालिकाके बाढपिडितहुनके स्थायी तथा दीर्घकालीन व्यवस्थापनके लाग नेपाल सरकार तथा प्रदेश सरकारके सम्वृद्ध निकायके साथे सरोकारवालासंग समन्वय तथा सहकार्य कैना बा । ओमनगर शिविरके मुक्त कमैयाके उचित व्यवस्थापनके लाग नेपाल सरकार तथा प्रदेश सरकारके सम्बद्ध निकायके साथे सरोकारवालासंग समन्वय तथा सहकार्य कैना बा । रक्त संचार केन्द्र (रेडक्रस) धनगढीसंगके सहकार्यमे कैलारीवासीहे निःशुल्क रगतके उपलब्धता कार्यक्रमहे निरन्तरता डेना बा ।

कैलारी गाउँपालिकाके प्रसुती असहजता आइल गर्भवती तथा सुत्केरीहे उपलब्ध करैना आइल निःशुल्क एम्बुलेन्स सेवाहे निरन्तरता डेजाई । कैलारी गाउँपालिकामे वैकल्पिक तथा खुल्ला विद्यालय, अनिवार्य शिक्षाके कार्यक्रम संचालनके लाग बजेट तथा कार्यक्रम तर्जुमा करजाई ।

गाउँपालिकाके सीप तथा दक्षता प्राप्त व्यक्तिहुकनके सीप परिक्षणके लाग सिटिइभिटिसंग समन्वय तथा सहकार्य कैजाई ।
गाउँपालिकाके उपलव्ध स्रोत साधनमे मितव्ययिता कायम करेक लाग संस्थागत समन्वय तथा सहकार्य अभिबृद्धि करके दोहरोपना न्यूनीकरणके लाग विकास साझेदारसंग समन्वयात्मक रुपमे लागत साझेदारीमे कार्यक्रम कार्यन्वयन कैना बा ।
गाउँपालिकाके श्रोत ओ साधनसे सम्पन्न करे नैसेक्ना योजना तथा कार्यक्रम कार्यान्वयनके लाग नेपाल सरकार तथा प्रदेश सरकारके सम्वद्ध निकायसंग समन्वय तथा सहकार्य कैना बा । गाउँपालिकाके सेवा प्रवाहहे जनमैत्रीके साथ सर्व शुलभ रुपमे उपलब्धताके लाग संस्थागत सुधारके साथे एकीकृत सेवा प्रणालीके शुरुवात कैना बा ।

गाउँपालिकाके प्रोफाइल निर्माण, आवधिक योजना निर्माण, मध्यकालीन खर्च संरचना निर्माण लगायत टमान कार्यविधि तथा मापदण्डके निर्माण करके पालिकाके सेवा प्रवाहहे व्यवस्थित तथा समय सापेक्ष बनैना बा । वडा कार्यालय, स्वास्थ्य संस्था, विद्यालयके साथे अन्य सार्वजनिक तथा सामुदायिक संघ संस्थामे संस्थागत सुधारके कार्यक्रम सञ्चालन कैना बा । स्वरोजार सृजनाके लाग स्थानीय कला, साहित्य, संस्कृतिके संरक्षण, सम्बर्धन तथा प्रवर्धनके सामुदयिक होमस्टे संचालानके साथे नागरिक परिचालनके कार्यक्रम संचालन कैना बा ।

कृषि उपजके संकलन तथा बजारीकरणके लाग कोल्ड च्याम्बर तथा हाटबजार संचालन कैना बा । गाउँपालिका भिटर रहल मुक्त कमलरी,भूमिहिन किसानके उचित व्यवस्थापनके लाग नेपाल सरकार,प्रदेश सरकारसंग सम्वन्वय ओ सहकार्य कैना बा ।