कञ्चनपुर ओ बर्दियाके संक्रमितके सम्पर्कमे रहल १९७ जहनके रिपार्ट नेगेटिभ
धनगढी, ३ जेठ । कञ्चनपुरसे काठमाडौं पुगल ओ आपन बुडिक् संग कैलाली पहुनी खाइ आइल बर्दिया घर फर्कल लौन्डिक् सम्पर्कमे रहल मध्ये हालसम सक्कु जहनके आरटी पिसिआर रिपोर्ट नेगेटिभ आइल बा ।
शनिच्चरके रोजसम परीक्षण करल दुनु संक्रमितके सम्पर्कमे रहल मध्ये १९७ जहनके थ्रोट स्वाबके नमूनाके नतिजा नेगेटिभ आइल जनागिल बा ।
प्रदेश जनस्वास्थ्य प्रयोगशाला धनगढीके निरिक्षक रामप्रसाद ओझाके अनुसार संक्रमित महिलाके कञ्चनपुरके बेतकोट नगरपालिका–१० हरपाल गाउँस्थित घरके ३० जाने छिमेकीहुकनके नेगेटिभ रिपोर्ट आइल हो ।
ओस्टके, बर्दियाक् लौन्डिक् सम्पर्कमे आइल कैलालीके गोदावरी नगरपालिका ओ भजनी नगरपालिका करके १६७ जहनके थ्रोट स्वावके नमूना फेन नेगेटिभ आइल निरिक्षक ओझा जानकारी डेलै । उहाँके अनुसार गोदावरी नगरपालिकास्थित लौन्डिक् सम्पर्कमे आइल १३४ ओ भजनी नगरपालिकाके ३३ जहनके रिपोर्ट फेन नेगेटिभ आइल हो । शुकके रोज स्वाब संकलन करल भजनीके १० जहनके किल आब रिपोर्ट अइना बाँकी रहल प्रदेश जनस्वास्थ्य प्रगोगशाला जनैले बा ।
