किसानहुकन अनुदानमे कृषि यन्त्र उपकरण

हसुलिया, ५ जेठ । कैलालीस्थित कैलारी गाउँपालिकाके वडा नम्बर ७ मे रहल हरियाली गहुँ पकेट क्षेत्रके किसानहे अनुदानमे कृषि यन्त्र ओ उपकरण प्रदान करल बा ।
मुख्यमन्त्री नमूना कृषि गाउँ कार्यक्रम अन्तर्गत कृषि ज्ञान केन्द्रसे ५० प्रतिशत अनुदानमे किसानहे कृषि यन्त्र ओ उपकरण प्रदान करल हो । यन्त्र ओ उपकरणमे किसानके ५० प्रतिशत लगानी रहल जनाइल बा ।
सोम्मारके एक कार्यक्रमके बीच हरियाली गहुँ पकेट सञ्चालन समितिमार्फत किसानहे उ कृषि यन्त्र ओ उपकरण वितरण करल बा । किसानहे २१ ठो पावर टिलर, २० ठो रिपर ओ दुईठो सीड ड्रिल वितरण करल हो । गाउँपालिकाके अध्यक्ष लाजुराम चौधरी किसानहे कृषि यन्त्र ओ उपकरण हस्तान्तरण करल रहिट ।
समितिके सभापति पार्वती चौधरीके अध्यक्षतामे हुइल कार्यक्रममे बर्का पहुना गाउँपालिकाके अध्यक्ष चौधरी, खास पहुना वडा नम्बर ७ के वडा अध्यक्ष कमलप्रसाद चौधरी रहल रहिट ।
यन्त्र, उपकरण वितरण अवसरमे कृषि ज्ञान केन्द्रके भूमिराज उपाध्याय, रामचन्द्र भट्ट, रणबहादुर मल्ल, सीमा प्रहरी कार्यालय रामपुरके प्रतिनिधि राजेन्द्र चौधरी, आइपीएम प्लान्ट डाक्टर सम्झना चौधरी, अर्जुन चौधरी ओ हरियाली कृषि सहकारीके अध्यक्ष लेखराम चौधरी लगायतके उपस्थिति रहल रहे ।