थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २३ अगहन २६४६, शुक्कर ]
[ वि.सं २३ मंसिर २०७९, शुक्रबार ]
[ 09 Dec 2022, Friday ]
‘ वडा नम्बर २, ६, ८ ओ ९ के सार्वजनिक सुनुवाइ ’

बन्दाबन्दीसे विकास निर्माणके काम प्रभावित

पहुरा समाचारदाता | २९ जेष्ठ २०७७, बिहीबार
बन्दाबन्दीसे विकास निर्माणके काम प्रभावित

हसुलिया, २९ जेठ । कोरोना भाइरस ओ बन्दाबन्दीके कारणसे चालू आर्थिक बरस २०७६÷०७७ मे ढिउर विकास निर्माणके कार्य प्रभावित हुइल वडा अध्यक्षहुक्रे बटैले बाटै ।

कैलारी गाउँपालिकाके वडा नम्बर २, ६, ८ ओ ९ मे करल सार्वजनिक सुनुवाइ कार्यक्रममे उहाँहुक्रे विकास निर्माणके कार्य प्रभावित हुइल बटाइल हुइट । कार्यक्रममे वडा अध्यक्षहुक्रे चालू आर्थिक बरसके कतिपय योजना बन्दाबन्दीके कारण अधुरे रहल बटैलै । ओस्टके, लक्षित वर्गके कार्यक्रम फेन सञ्चालन करे नाइ सेकल बटैले बाटै ।

वडा कार्यालयहे पारदर्शी ओ जवाफदेही बनैन उद्देश्यके साथ कैलारी गाउँपालिकाके आयोजनामे सक्कु वडामे चालू आर्थिक बरसके प्रगतिबारे सार्वजनिक सुनुवाइ करल हो । वडा नम्बर २ मे हुइल सार्वजनिक सुनुवाइ कार्यक्रममे उ वडाके वडा अध्यक्ष सन्तु चौधरी कोभिड–१९ ओ बन्दाबन्दीसे विकास निर्माणके कार्यमे ढिउर प्रभाव परल बटैलै । उहाँ कतिपय योजना सम्पन्न करे नाइ सेकल उल्लेख करटी आपन गाउँठाउँहे मजा बनाइक लाग सक्कु जनहनके सकारात्मक सहयोगके जरुरी रहल बटैलै ।

अब्बे विश्व नै कोरोना महामारीसे जुझ्टी रहल बेला मनैनके ज्यान जोगैना नै पहिल आवश्यकता रहल अध्यक्ष चौधरी बटैलै । विचैपुर माविके भवन निर्माणके बजेट फ्रिज हुइ नाइ डेना, कृषि उपज संकलन केन्द्रहे व्यवस्थित बनाइक लाग पहल करटी रहल उल्लेख करलै ।

वडा नम्बर २ के सार्वजनिक सुनुवाइ कार्यक्रममे वडाके सचिव हिरा ठकुल्ला चालू आर्थिक वर्षमे हालसम हुइल प्रगति विवरण प्रस्तुत करल रही । उ वडामे कतिपय योजना सम्पन्न होसेकल बावै । ओस्टके, वैशाख मसान्तसम छ लाख दुई हजार रुपैयाँ राजस्व संकलन हुइल सचिव ठकुल्ला जनैली ।

कार्यक्रममे वडा सदस्य रामकुमार चौधरी, लक्ष्मी चौधरी, कृत्थी दमाई, लाल ठकुल्लासहित टमान गाउँके भलमन्साहुक्रनके सहभागिता रहल रहे । कार्यक्रममे पतिराम चौधरी, नविन बोहरा लगायत जिज्ञासा राखल रहिट ।


ओस्टके, वडा नम्बर ६ मे हुइल सार्वजनिक सुनुवाइ कार्यक्रममे वडा अध्यक्ष प्रेमबहादुर चौधरी बन्दाबन्दीके कारण लक्षित वर्ग अन्तर्गतके कौनो फेन कार्यक्रम सञ्चालन करे नाइ सेकल बटैलै । वडा कार्यालयसे चालू आर्थिक बरसमे सञ्चालित ढिउर जैसिन योजनाके काम भर सम्पन्न होसेकल उहाँके कहाइ रहे ।

कार्यक्रममे भलमन्सा रतिराम डङ्गौरा थारु वडा कार्यालयमे कर्मचारी कम होके काम कराइक लाग समस्या हुइना गुनासो करल रहिट । उ वडाके सचिव अनन्त कँडेल चालू आर्थिक बरसमे जम्मा १२ ठो योजनामध्ये हालसम ७ ठो सम्पन्न हुइल ओ बाँकी योजनाके काम अधुरा रहल बटैलै । वडा नम्बर ६ के वडा कार्यालयसे चालू आवके हालसम छ लाख ८६ हजार रुपैयाँ राजस्व संकलन करले बा ।


ओस्टके, वडा नम्बर ८ मे हुइल सार्वजनिक सुनुवाइ कार्यक्रममे वडा अध्यक्ष दुखीराम कठरिया सक्कु कार्यक्रम तयार पारल बेला लकडाउन हुइलपाछे काम कैना ढिउर नै समस्या हुइल बटैलै ।
योजनाके काममे ढिलाइ हुइल स्वीकरटी उहाँ मजा बनैना जिम्मेवारी फेन सक्कु जनहनके कन्धामे रहल बटैलै । सहभागीसे उठाइल प्रश्नके जवाफमे उहाँ क्वारेन्टाइन मजासे व्यवस्थापन करल ओ वडाके लाग गाउँपालिकामार्फत एम्बुलेन्स खरिद कैना हुइल ओरसे ढिलाइ हुइल बटैलै । कार्यक्रममे वडा सचिव तुल्सीराम चौधरी चालू आर्थिक बरसके हालसम उ वडा कार्यालयसे हुइल प्रगति विवरण प्रस्तुत करल रहिट । वडा नम्बर ८ के वडा कार्यालयसे वैशाख मसान्तसम पाँच लाख ६६ हजार रुपैयाँ राजस्व संकलन करले बा । औरे बरस ११ लाखसम राजस्व उठ्ना करलमे यी बरस राजस्व सङ्कलन फेन घटल सचिवके कहाइ रहे ।

ओस्टके, वडा नम्बर ९ मे हुइल सार्वजनिक सुनुवाइ कार्यक्रममे वडा अध्यक्ष खेमराज चौधरी छाडा चौपाया समस्या सक्कुु जनहनके साझा समस्या रहल ओरसे समाधानके लाग साझा पहल हुइना जरुरी रहल बटैलै । उ वडामे चालू आर्थिक बरसमे सञ्चालित कुछ योजना पूरा हुइल ओ कुछ काम बाँकी रहल जनाइल बा ।

कार्यक्रममे वडा सचिव ठागुराम चौधरीे चालू आर्थिक बरसके हालसम हुइल कार्य प्रगति विवरण प्रस्तुत करल रहिट । उ कार्यक्रममे सामरचौराके भल्मन्सा लाहुराम चौधरी, देवीगञ्जका अन्नु चौधरी, गदरियाके ठग्गी राना लगायत जिज्ञासासहित आपन गाउँठाउँके समस्या राखल रहिट । सार्वजनिक सुनुवाइ कार्यक्रमके सहजिकरण नेपाल आदिवासी जनजाति पत्रकार महासंघ (फोनिज) कैलालीसे करल रहे ।

जनाअवजको टिप्पणीहरू