सेती प्रादेशिक अस्पतालमे उपचाररत कोरोना संक्रमितके ज्यान गैल

धनगढी, ३ असार । शनिच्चरके रोज पुष्टि हुइल कैलालीके गोदावरी नगरपालिका वडा नम्वर ४ के ४६ बर्षीय संक्रमित थारु मनै (पुरूष) के सेती प्रादेशिक अस्पतालमे ज्यान गैल बा ।

स्वास्थ्य अवस्था बिग्रलपाछे सेती प्रादेशिक अस्पतालमे आईसियूमे राखके उपचार हुइटी आइलमे बुधके रोज साँझ्याके ज्यान गैल अस्पताल जनैले बा ।

उहाँके मंगरके रोज रातसे स्वास्थ्य अवस्था बिग्रल रहे । मंगरके रोजसे उपचारके लाग काठमाडौँ लैजाइक लाग एयर एम्बुलेन्सके लाग पहल हुइलेसे फेन एबुलेन्स पाई नैसेकगिल रहे ।

यहिसे आघे उहाँके नवजिवन अस्पतालके आइसोलेसनमे उपचार हुइटी रहल बेला कोरोना पुष्टि हुइल रहे । यी संगे सुदूरपश्चिममे कोरोनासे ज्यान गुमुइयाहुकनके सङख्या ४ पुगल बा । यहिसे आघे कैलालीके दुई महिला ओ बाजुराके एक बच्चाक्मे मुवलपाछे कोरोना पुष्टि होसेकल बा ।